KUM 11 HNU A KIR LEH NA

Kum 2001 September thla a lo nih khan Khawvelin a theihnghilh tawh ngai loh tur chhiatna rapthlak a lo thleng a. World Trade Centre Building ropui tak mai chu Alqaeda thihchilh pawl ten Bomb hmangin an run a, Mipui sang tam tak an thi a. Khawvel chuan chu chanchin lungchhiatthlak chu an buaipui ber a ni.
    Chutih lai chuan chung chhiatna rapthlakte chuan rilru ala ve mawlh lo, Ka ngaihtuah ber chu “Ruih tur enge ka neih theih” tih hi a ni. Ka ban phak ruihhlo eng pawh ka rui a ni deuh ber. Chung ruihhlo te chuan salah min hruai a, mipui te leh roreltute lakah thiam loh changin ka duh ber leh ka buaipui ber ruihhlo avang chuan Kawngkhar sen lian tak chu ka tan hawnin a lo awm a, kawngkhar sen chungah chuan  rawng var hian ‘District Jail Kolasib’ tih hi hai der theih hauh lohvin lian tak hian a lo inziak a.
    Ka mut bu tur min pek chu ka han en a, Ka phah tur Sipai Kawmawl me tak ang chi kha pakhat, Ka Lukham tur Kawmawl bawk pakhat leh ka sin tur chutiang Kawmawl bawk pakhat chu a lo ni a. Chung Kawmawl chungah chuan Silver thleng lian zet pakhat leh Silver No beng nei pakhat a awm bal bawk a. Chu zawng chu ka Luhpui chu a ni mai.
    Chutiang tak chuan Sual bawihah tangin Ruihhlo avangin District Jail-ah chuan hun rei tak ka lo zuk hmang ve tawh a.
    2002 kum a lo nih khan Doctor-te beidawn ram ramna khawp natna hmangin Pathian Kohna vawi hnih ka dawng a, ka natna chu thihpui mai dawn a ka inhriat laiin Pathian siam tharna te changin Pathian chuan Khawvel damdawite hmang lovin, Ser awm lovin min tidam ta!! Chuta tang chuan ka nun chu a inthlak danglam chho ve ta a.
    Rawngbawlna lamah kum 11 zet ke ka pen ve hnuah, Vawiin Dt.28.11.2012(Nialini) hian KTP ruahmanna in Sual avanga buai a, Ruihhlo avanga ka luhna Jail-ah ngei chuan ka lut leh ta! Ka luh chhan erawh Ruihhlo vang ni tawh lovin Isua Krista avang zawkin a lo ni ta! He hun min hruai thlengtu Lalpa chungah lawmthu ka sawi tak meuh a ni.

    Khang kum 11 kal taah kha chuan miten an fanu te ka ngaihzawn an remti lo a, tumahin inlengah min duh hek lo. Ui tluk leka min ngaitu te khan vawi engzat fakau nge an In atanga hmunphiah nen a min hawl chhuah tak ka hre ta lo. An Tui ka in takngial pawh phallo tu kha ka va tawng hnem em! Sual bumna avanga hnehchhiahin ka awm a, mite hmuhsit leh endawng ka hlawh fo thin. Mahse a awm a lawm, mite duh loh titu leh khawtlang tana mi hnawksak ka ni miau a.
    Tichuan kum 11 a lo liam a, Kum 2012 alo her chhuah meuh chuan, Pathian khawngaihna nasa tak avangin, mi Nu leh Pa ten an Fate kawm turin min rawn pan ve a,  An nuna harsatna nei ten tawngtaipui turin min rawn sawm ve ta fo mai a!! Kohhran lamah KTP Branch Asst. Leader te, Leader dinhmunte hial ka lo chelh ve tawh reng mai!!
    Ka phu loh chawimawina min hlan a, ka duhthusamin a thlen phak loh ram min chuan tir a, mi pangngaite ang a min siam a, kum 12 liam ta a Ruihhlo avanga ka luhna Jail run ah ngei, Krista avanga min hruai lut leh a, Jail tangte hnen a “Khawvel Mamawh chhanna Isua Krista” tih thupui sawi thei tur a min hruaitu, ka mamawh chhanna Isua Krista chu fakin awm rawh se.