Love Story

Thaikawi mai duhtawk lo a,
Kan intawn Ni hmasa berah khan;
Nghet takin ka kuah che a,
Am takin ka fawp che a;
Lungmuang takin ka tang bel a,
‘Ka zak è’ i tih Ni kha…

Hun leh Ni a liam zel a
Tiam tlat e kan tih Ni khan;
Nghet takin ka chelh che a
Lung chim takin ka en che a.
Dim tè a min kheuh pah a
‘Ka zak e’ i tih Ni kha..

Lawi that zan alo thleng a,
I par thianghlim ka thliah zan khan;
Thlahlel takin ka khal che a,
Duhthawh takin ka chul che a.
Maimit chhinga thaw halh halh chung
‘Ka zak è ‘i tih Zan kha…

Fanau rila rah chawi tur a,
Damna Run kan kai ni khan;
Dim tè-in ka kai che a,
Chhel turin ka chah che a.
A sehsam nä pawh sawi lo a
‘Ka zak è’ i tih Ni kha…

Pialral zinkawng zawh tur a,
Natna khum i belh lai khan;
Cancer dam tur ka ti che a,
Lungchhe takin ka hnem che a.
I ankä hnuhnung ber nitur a
‘Ka hmangaih che’ i tih Ni kha..

Rauthlain min rawn thlir la,
Fam zun ngaiin patling ka kur e.
Ka tlang zarh ta misual ti ti naah;
Kan nunhlui leh i anka te kha
Nuimawi chhuaha kimki chungin
‘Ka zak e’ lo ti leh ang che Ma…

Source:

Jhun Pyou Syndrome

German ral run te chu nepte a ni mai lo maw? Kalna apiangah Jhun Pyou leh F4 te hming hriat tur a awm a, kan nula leh tlangval tam tak incheina thlak dang lamtu pawh Korean serial hi a ni ta ber mai.

Mangan thlak khawpin Thalai ten he thil hi an atchilh a, Nula tlangval inhmangaihna kawngah lah he thil hian awmzia thui tak a nei ta tlat bawk si. Kan tawng kauchheh leh kan inngaihzawn dan pawh a inthlak ta. Heti em em a mizo ten kan atchilh a, kan khukpui ta ruai mai hi mak ka ti thin.

Idol leh Icon ten hmun sang tak Thalaite ah a chan lai khan, mi tam tak chuan, nakin lawkah chuan kan zaithiante zingah Idol/Icon Contest ah ka la tel lo, tih hi an intihtheihna a nih ring pawh an awm nual mai. Chu tawngkam chu kei pawhin ka hre ve tawh nghe nghe.

Hetianga thil thar kan buaipui ruai zel mai thin hian, nghawng eng eng emaw chu a nei nual tawh mai. Lal Isua an aiin Jhun Pyou leh Chandi te an chu kan chak zawk ta mai a ni lo maw?
Lo dawn ve chhin teh.

Eirukna nge ZU

Zet-u-zu hi mizo ten kan pi leh pu atang tawh akan lo hmel hriat kha a ni a, mahse tunah chuan kan hmelma lian ber chu ZU hi niin kan hre ta talt mai hi engvang chu ni maw? A chhan tha tawk tak a awm ngei turah ka ngai tlat a ni.

Mihuaisente kan duhsakna lan tir nan leh chawimawina sang ber mai chu ZU hmang hian kan entir ber thin a nih kha, zu nopui dawn thei ngat kha chu..!! Mihrang leh sa hrang hmaah pawh zam ngailo mihuaisente chawimawina chu misual leh mi dukdaklote in turah kan ngai ta!!

Kristianna in Mizote min run atang khan zu hi sual a ni ti a kan ngaih dan kan siam tanna chu rawn intan chho niin alang ber mai. Kan Bible thu hi kan chian a pawimawh zia alang hle in ka hre thin. Zu hi sual a ni atih ngawt theih aniin alang em?

Kan taksa hi Pathianin a duh taka a siam a ni a, amah chawimawi nan a hman tur a ni. Tichuan tihian ka ngaihtuah thin, Zu hi kan hmang sual a, taksa leh chhungkaw tana chhiatpui tham khawp a kan in a nih chuan kan tisual chhiava a ni ngei ang. Tin, Pathianthu pawh hi kan kalsualpui a, chhiatphah nan kan hmanga, mite kawng nilo zawk zawhpui nana kan hmang a nih chuan chu pawh chu sual lian tak a ni ngei ang. Engkim mai hi kan tih lutuk a, a lo a luakchhuaka kan ti a nih chuan sual a ni vek mai. Chaw pawh hi kan ei tam lutuk chuan sual tho a ni. Kan Bible chuan 'chutichuan....ei puar lutuk nan...' a ti a ni.

Chuti anih chuan engkim mai hi, ka tih awmzia chu thil tha zawng zawng pawh hi, uchuak taka kan ti a nih chuan sual a ni vek mai.

Kristian ten sual kan tehna tur ber chu kan Bible hi a ni. Bible in a sawi bak baka sual kan siam belh chiam chiam mai hi, Bible in thiam loh a chantir tAk, Dan chunga dan rip tak tak chherchhuantu a tihte kha kan ni zawk mai ang tih hi hlauhawm tak a ni.

Sual a nih zia chiang taka lang nghal mai eirukna kan do ngam tak tak silo em ni? Kohhran a sum lut a tlem kan hlauh avangin eiruk ni a rinhlelh sum hi kan hnawl ngam tawh ngai em? Kohhranhote hian kan hnawl ka la hre tlatlo, kan ngamna tawk Zu erawh kan dona ngamin Total Prohibition Act pawh Sawrkarin a siam theih nan theihtawp kan chhuah em ni khah!!?

Eiru ngei ni a vantlangin an ngaih pawh Pulpit tlangah an au dum dum lai hian, zu in mite chu kohhran thiltihna hmunah hnawk kan ti thin em ni khah?

Kan Pathian Biak hian kan thiltih dan hi engtin nge a ngaih ve ang aw ka ti thin.

Award dawng turin Pi Zokhumi Vankung

GD Birla International Award for Humanism dawng tur chu thlan fel an ni a, India ram pumah mi 3 thlan an ni a, chung mi pathum zingah chuan kan Mizo Nu Pi Zokhumi Vankung chu thlan tel ve a ni.

Pi Zokhumi Vankung hi India sipai Brigadier Vankung(L) nupui kha a ni a, Mizoram Presbyterian Church Central Kohhran Hmeichhia ah Chairman lo ni tawhin, MHIP Gen.Headquarter-ah pawh hruaitu hnate lo thawk tawh a ni a, tunah hian Spastic Society Aizalah Chairperson nihna a chelh mek a ni.

He award hi March ni 8 khian delhi ah hlan a ni dawn a, kan mizo hnahthlak he chawimawina Award dawng thei kan nei ta hi a lawmawm a, a chhuanawm tak zet a ni.

Ka nuih a za thin

Kan ram Sawrkar kalphung leh ram hruaitute chet zia ka ngaihtuah chang hian ka nuih a za thin ngawt mai.

Inbumna hian hmunlairil tak a chang tawh a, dawt hmanga inzawrhna chu thil nihphung pangngaiah kan ngai mek a nih hi. Inthiam lohna nei lemlo hian an hamthatna tur ngaihtuahin dawt thu leh thu puarpawleng mai mai theh darhin an vir sek a, mawng vawm ba an sawi ang mai lah ni hlawm a. Thutiam atam a, atak erawh hla tak a ni.

Ral lehlam hla takah chuan eng de ve ve awm mahse, chu eng min thlenpui thei tam tak zingah, chumi thlenga min hruai duhtu lah an awm hauh silo. Chutichuan mipuite pawh hian chu eng kan banphak reng a awm chu, kan banphak ngai loh turah kan ngai ta mai a nih hi.

Eng, eng takin a chhun phak reng si ah, chu hmunah ngei chuan thimah kan awm mek a nih hi. Mipuite thinlungah beiseina sang tak an dah hnuah , a hma aimaha thim chhah zawk chuan min bual leh thin. Tichuan, beidawnna thinlung pai tam takte chuan retheihna lamtluang an zawh tan mek ta a, chu chu kan Politician te Politics chu a ni.

Mirethei, aw a ni, mirethei takah min chhuah ang a, chumi hunah chuan cheng singhnih khat chauh pawh mamawh em em, hmu lian em em dinhmunah min din tir hunah zet chuan, he ram hi kan Politician te ta alo ni ang a. Chutih hunah zet chuan ram chu tah leh rumna in alo khat ang a, cheng singhnih khat lek lekin an inlei tling zung zung tawh mai dawn a ni. Chu chu a ni mai lawm ni kan ram hruaitute thil tum chu? Kan ram inkaihhruai dan ka ngaihtuah chang hi chuan ka nuih a za thin.

Bilkhawthlirah kawng zawh

NGO Co-Ordination Committee bultumin nimin khan Bilkhawthlirah an veng mi Zorammuani Lailapur bula rawng taka thah a nih duh loh lantir nan kawng zawh a ni.

He hunah hian YMA, MHIP leh MZP aiawh ten thu an sawi a.Thusawitute chuan, rawng taka inthahna hi an dem thu sawiin, Media kaltlanga Mamuani thattu ni a rinhlelh an man ni a sawi chu thu diklo a nih thu sawiin, Bilkhawthlir khua chu hetiang mai mai a, bumin an awm loh tur thu leh arang thei ang a tualthattu hi man a nih loh chuan a tul anga hma lak zel an tum thu an sawi.

Tualthattu hi ana thei ang bera hrem an phut thu leh zawn chhuah anih thuai loh chuan an theih anga hma lak zui an tum thute an pass a ni.

Serlui ah Sakei !!!!

Serluii leh a chhehvela hnathawka awm thenkhat chuan Serlui dungah tunlai hian Sakei lian tak awmin an sawi a, he sakei hi mita hmu chiah chu an awmlo nachungin, a hniak tharlam tak tak leh a thawm hria te pawh an awm a ni.

Forest Dept Kawnpui lam chuan Serlui leh Tuirial dung vel kar tawn thin Sakei lian tak a awm ngei niin an sawi bawk. Kan ramah sakei hi avang tawh hle a, an riral mai loh nan a humhalh hi mitinte mawhphurhna a ni.

Hamas Terrorist Dubai a that tu Mossad?

Khing mi te khian Europian (British/Irish/german/French) passport hmanga Dubai ah zin in Israel sipai 2 that tu ni a puh Hamas Terrorist Mahmoud al-Mabhouh a chu a hotel ah an that (assassinate) ani ti in Dubai Police ten an puh. Khi mi te khi ilo hmu anih chuan in veng police ilo hriat tir dawnnia (interpol warrant an issue tawh ani awm e).

An passport leh thlalak a suak ani tih hriatna ni a an sawi thenkhat te, hmeichhia khi mipa anih hmel a thlalak lian zawkah a Adam’s apple a hmuh theih an ti, a sam te khi sam lem anih hmel an ti. Tarmit bun ho khi passport thlalak ah hian tarmit bun an phal ngai lo tlangpui bawk.

Israel hian he puhna hi a pha lo a, a pawm hek lo. Israeli intelligence Mossad ti a koh hian phuba lak an hrat hle a, 1972 Munich Olympics Germany a Israeli Athletes ho thattu Palestinian Terrorists ho Europe ram hrang hrang a an veh thluk dan film hmuhnawm tak Steven Spielberg a film Munich hi en chi tak ani, khitiang lam film i ngaina anih chuan.

TUI HMANGA INENKAWL DAN

Thlasik a ni a, masi leh kum thar lawmna lam chu kan hmang zo leh ta reng mai. Hritlang khawsik, pum lam chiang lo vanga masi hmang nuam lo tam tak an awm tih ka hriatin, hei, hun awlah he lai thuziak hi la chhiar ve lo kan awm takin duhsak takin ka rawn hriattir ang che. He thil hi a dik a, a bik takin hritlang khawsikah phei chuan kei ngei pawhin ka lo dampui ve tawh a. Lo ti ve chhin teh u.
1. Zing thawh veleh ha nawh hmain no 4, 160ml in tur.
2. Chumi hnu ha nawh zawh minit 45 chhung chu tui leh thil engmah ei emaw/in emaw loh tur a ni.
3. Minit 45 hnuah chuan thil a ei theih tawh.
4. Minit 45 hnua thil/chaw ei zawh hian darker hnih chhung tui emaw, thil dang emaw eia in loh tur a ni.
5. Damlo emaw tar emaw tui in harsa ti tan chuan a ţantirhah tlem deuha ţanin, ni tin in tam chhoh tial tial tur a ni, no li thleng.
6. Heti anga tui in hian a chunga tarlan natnate khi a tihdam theih bakah hriselnaa tan a ţha em em a ni. Hetianga tui ina inenkawl hnua natna a dam emaw, natna a ziaawm hun tur emaw chu a hnuaia mi hi a ni:
1. Thisen sang (high blood pressure) – ni 30 hnuah.
2. Pumpui na – ni 10 hnuah.
3. Zunthlum (diabetes) – ni 30 hnuah.
4. Kawpuar (constipation) – ni 10 hnuah.
5. Cancer – ni 180 (thla 6) hnuah.
6. TB – ni 90 hnuah.
7. Ruhchuktuah ná (arthritis) – ni 10 velá ţangin.

Khawngaih takin mite ţhian ţha nih tum la, he lehkha hi i nuna pawimawh i tihte hnenah pe ve hram ang che.

Ziaktu: David Malsawmtluanga

(He thuziak hi mi(sual).com atanga lak chhawn a ni e. Lo tangkaipui mawlh teh u.)