eng awm chhun a thim pawha
ruihna hlo duh awm
ruah karah khaw thiang
rinna-in mi thlir tir a
hling aiah pangpar"
hringnun zin kawng zawh a nuam,
tum ram thlen ai paw'n.
arsi piah ramah
mi hruai, mi thlen lo mahla,
ka chakna i ni."
Chhum thim chha tak a lo lang a, kawlah ni a chhuak tawh dawnlo em mi ti a, furpui an tuar tlawk tlawk ang mai hian, hringnunah hian beidawnna in min hual vel a, ka velah thimin min bawm a, beiseina ni eng chu lang mai tur hian a mawi thin silo.
Thinlung a chau zova, rilru a in Ar bo a zawng a, hmuh tur erawh a awm silo! A chhan leh vang ka dap a, khuarkhurum thuk tak a kharhnan tlat ang mai a ni. Ka hawi vel a, vanduaina ten sipai rual ang maiin min rawn nang ching ta.
Tah a chhuak a, tah erawh a har si. Mittui a hnai a, mittui erawh a tla thei silo.Kiltinah harsatna ten min hual vel a, leirah a rem theilo a, hmun rem rap turin rahbi ka tuk thei mawlh tawh silo.
Mahse, chu lunngaihna chhum dum chha tak chuan min chim mahse chakna pakhat ka nei thin!! Beidawnna kara beiseina eng de ve ve chu ka tan chakna a ni. Chu chauh chu innghah chhan neilo kei ka tan hian a ruka ka innghahna a lo ni reng mai.
Buaina kara Ni eng mawi tak lo lang leh, Vanduaina kara hlimna kawl lo eng tur chu nghak fan fantu tan lo chuan a par mawina thliak hman lova mual liamin kan lo hnu chhawn fo thin. Beisei tur awm tawh loh hnu a beiseina chhete tal chu i tan hlimna khua ti vartu tur a ni tih hi theihnghilh duh bik suh ang che.
