FACEBOOK

Hun rei pawh ala ni lo, Facebook kan hmelhriat tanna kha. Mahse, tunah zet chuan kan va hmang tangkai ta em. Facebook user te tan chuan chanchinbu(Daily News Paper) leh TV News Programme te en kher pawh a ngai ta lo tawp mai. Tun mai a Zoram chhimtawp a thilthleng pawh, Hmartawp lama mi pawhin Minute 5 pawh a ral hmain kan hre nghal zung zung ta mai. Media hmasawnna sang tak keng tel Facebook hi kan va hmang tangkai teh lul em.

MIRC hun laiin Internet Cafe hrang hrang a lun em em a, MIRC chater ho chuan an atchilh kha ani deuh ber mai a. A hnu lawkah Orkut a lo hluar chho ve leh a, Thlalak mai pawh nilovin, Internet hmang khan Hmel inhmu rengin(Video Chat) kan in be thei ta hlawm a, Tin, Chat a nuamin a him a, privacy tha tak hnuaiah kan inkawm tlang ta a. Facebook alo chhuak leh ta zet hi chu ava changkang tawh tehlul em, Kan duh duh kan tithei ta a ni ngawt tawh mai.

Tin, Mobile service hrang hrang ten GPRS(General Packet Radio Service) an pe chhuak a, Thalai Mobile Phone nei zawng zawng chuan Facebook hi an khawih ta vek emaw tih mai theih ani ta.

Facebook ah hian Group hrang hrang kan siam ta sup sup mai a, Group thenkhat te phei hi chu ninawm tih chang ka nei fo mai a, kan Privacy min zahpah hauhlo a, an duh duhna Group a min add reng mai te hi ninawm lamah a chang ta lek lek mai.

Tin, News Group te siam a niin, chanchinthar kna inhriatpawhna tangkai tak an ni chho ta zel a. Tin, Thenkhatin Rawngbawl nan a hmangin Pathianthu hmanga mite zirtirna an lo nei mek bawk a, kan rawngbawlna pawhin a thleng thui thei ta hle mai.

Hetianga tangkai taka hman anih mek lai hian, ka ngaihtuah thin a, thenkhat hi chuan hetianga Facebook user kan thathnem tak deuh ah chuan Politics khelhna remchangah an hmang ta a ni ber hian ka hria! Mizoram vei leh a thatna duh em em ni a, in sawiin, Zoram thatna tur an rel luih luih a, sawiselna in an khat a, Politics siamthatna lam ai mah chuan an mahni Party hamthatna an ngaihtuah ta ni awm tak a ni. Tin, Party hrang hrang hian FB lama incharge te pawh an insiam ta hlawm ni ten ka lo hria a, dik tak maw?

Thalai naupang zawkte rilru hruai kawi tumin an inhnial luih luih a, kan Thalai naupang zawkte hi kan ram Politics tui nu takah hian an chiah hlum zo ang tih a hlauhawm thinin ka hria.

MIZORAM RAMRI KA TLAWH VE A

Ni 11/11/11 atanga Ni 13/11/2011 hmang khan kan Branch KTP in Phaisen Branch KTP te tlawhin kan kal a. Phaisen Khua hi Mizoram Hmrathlang lam a awm a ni a, Thingtlang khuaah pawh la thingtlang ve tak a li ti ila ka sawifiah thiam dan tawi ber chu a ni mai e.

A khaw hmun tak hi chu Mizo ten kan tih dan pangngai angin tlang bawk lai bawh in an inbawk khawm a, a khaw sir tawn tawn erawhchu Phaizawl nuam tak a ni a, leilet zau tak tak a awm a, Mizoram a Phaizawl kan neih zingah chuan a zau berte zing a mi a ni.

Phaisen atanga Kilometre 1 pawh tlinglo ah hian Mizoram leh Assam inrina a awm a, he hmunah hian Picture a kan hmuh ang hian PWD(niin ka hria a ka chiang chiah lo) IB a awm a, he IB ah hian 1st IR Batallion ten post neiin awmhmun an khuar ve mek bawk.

Phai kal manah Nula thla kan lakpui ve a nih hi. :)

Ka sawi duh tak zawk chu he hmun hi tun thleng hian tih fel ala ni lo a, Phaisen khawchhung thleng hian Assam lam chuan an ram niin an sawi a, Mizoram hian kan ram chin niin a ngai bawk a, IR post piah deuh ah hian Assam Police ten hmun an khuar ve bawk.

Ramri chin ni a Mizoramin a ngaih chinah hian YMA ten Signboard tar in chhinchhiahna an siam a, he hmun piah lawk mit a hmuh phak maiah hian Vai dawr a awm tan a, Sap Zu chihrang hrang lei tur a awm nghal a, Sawrkar hian a khuahkhirh mek lai hian he hmun atanga lak luh hi a awlsam awm mang e tihte ka ngaihtuah a.

Tin, kan state ramri chin hi chhim leh hmar ah hian a chianglo nuaih mai a, hengte siam fel ngam ram hruaitu hi kan mamawh hlein ka hria.

HRITLANG DAMDAWI THA

Tunlai hian sik leh sa inthlak lai mek ani a, tlang hrileng a tam hle mai a. Hritlang avanga harsatna tawk ten inlo tangkaipui ngei ka beisei e.

Hritlang damdawi atan chuan hei hi a tha khawp mai. A siam dan tur ang tak hian lo siam ve chhin teh darkar 24 chhungin a result a lang hman ngei ngei a nia.

Thingpui sen tak deuh takin lum la, Thingpui No khatah 'Pudina' hnah 8 vel telh la chhuang so bawrh bawrh ang che. Chuan, No ah i thlit chhuah hnuah Khawizu chini aiah a thlum tawk velin telh la(Khawizu hi a awm remchan loh chuan Chini hman mai pawh a tha ve tho mai). Chuan chu chu sa deuh ver vawrin, i in ngam tawka sa in in ang che. No-1 zelin in la, nikhatah a zing thei anga in a pawilo.

Zial zu mi i nih chuan darkar 24 tal chu nghei ang che he treatment i lak chhung hian. A hmanruate hi kan sawi nawn leh ang e.

1. Tui No-1

2. Thingpuife.

3. Pudina hnah

4. Khawizu(Khawizu i hmuh mai theih loh chuan Chini pawh a tha ve tho)

Hei hi ka practice fo tawh a, tin, ka thiante pawh ka tih tir tawh hlawm a, tha an ti khawp mai. Mei zu mi pawh nila, i hritlang apik hle tawh pawh ni se la, I mei zuk i nghei rih a, Darkar 24 chhung a i damdawi in hian hna a thawh loh emaw, i hritlang a ziaawm phah lem loh chuan he blog ah hian min lo hrilh leh ka beisei a nia.

Ka pi i zunah maw ka lo uai a?

Phu loh tih hriat reng ten min duh loh pawh na kan tih tawh lai a, phu ve em em a kan inhriat ten min han hnawl chhak mai hi chu aw, a nat dan hian thisen hi a fan chhuak dap hian ka hre thin ti a, min hrilh mawlh mawlh lai chuan, ka ngaihtuah chu alo kal hrang daih tawh a.


Hmangaihna hi enge a nih le? Hmangaih i neih khan engvangin nge i hmangaih? Nge chhan awm miahlo in hmangaihna chuan a hmangaih mai zawk?

Ka rilruah hei hi alo lang, Mi an inhmangaih hian , An hmel tha an inti a an hmel an in ngaihzawn vangte, Thenkhat chuan, an Hmangaihte hausakna avangin an sum neihte avangin an hmangaih a, thenkhat chuan Sex a an san em avangin sex a sang zawk hnam te pawh an nei ani mahna le(?). A dang pawh chhan hrang hrang ala awm ang.

Heng zawng zawng hi hmangaihna a ni vek maiin ka hria. Hmangaih tur chuan hmangaih chhan a awm angai a, mahse, kan hmangaih chhan a pawimawh berlo a, kan hmangaih tak tak em tih kha a pawimawh ber chu niin alang.

Sum a vanga hmangaihtu chan a retheih hunah a hmangaih zui tawhlo ang inti em mi? Hmel avanga hmangaihtu pawhin a hmelthatna a chuai hunah pawh ahmangaih tho ani lawm ni?

Hmangaihna chu Hmangaihna a ni. A chhan a pawimawh ber lo ....nang pawh ka Pi i zunah maw ka lo uai a, ka uai chhan lah ka Pi i ni miau a...." tiin ka ngaihtuahna chu zuk kal thui ta phian a!!

Mizo te chim chin alang(?)

Mizo te hian mite tih ang hi kan lo ti thei ve vek zel mai hi a lawmawm thin ngawtin ka hria. Hnampui zawkte leh hnam changkang zawkte tih ang ti theilo ni a kan in hriatna kha kan paih ta hret hret a a lawmawm ngawtin ka hria.

Mizo Idol/Icon te hial pawh kan Cable TV te kal tlangin kan thlang ve ta sek mai. Hmasawnna rahbi thar chu ani ngei awm e. Mahse, heng kan show buatsaih ahte hian kan chim chin alang thinin ka hria.

Idol / Icon ah te hian Mipuite vote hmanga thlan a ni ta zeuh zeuh a, Mobile phone sms kan hmang tangkai hle. Hetih lai hian thil fel tawklo chua  awm thin. Heng ang chi hi SMS hmanga vote lakna dang ram changkang zawkte hian an tawk ve thin em aw(?) ka hre lem lo a. Mahse, hmasang kan ngaihna lai tak chu ani ve in ka hria.

Tin, Kan zaithiamthlan chhuahte hi ka ngaihtuah hian, Mizo te hi a lungkuai zawnga thil sawi leh ngaithlak nuam ti chi kan niin ka hria. Music lungkuai lam leh Sentimental lam hi kan ngaina em em a, kan Idol/Icon te pawh chung Music hmanga zai mi chu an ni deuh zel mai!

Rocker hoin Mizo thinlungah hian hmun an chang sanglo hlein ka hre thin. Tin, Alternative Rock, Hard Rock tih ang chi Music hmanga zai ho phei hi chu thiam kan ti teh chiam lawmlo emawni, an thleng sang mawh thin ngawtin ka hria. Music kan man chin leh Music lama Mizote chim chin hi a sanglo rih viau nge ni a, kan chim chin hi a lang thei deuh ruau ruu chuan ka hre thin.

KAWL A SEN LUNG A LENG

Rim a neite anih ngai chuan eng rim emaw chu a nam a ni tih hriat tak hian Ni chu Khawtlang lamah a her awn bui bui a, a enga  chhuah sen phut danah Vangpui rim nge Thlasik rim a nam tawh zawk tih pawh ka hre thiam hauh lo.

Ka dawr te takte chep khir kherah chuan nilengin lum ti em em a ka thut thlan hluam hnu chuan, tlai lam a lo her chhuak a, Ni chuan awn deuh chha hian min hel chho zel a. Khawlum a  zia awm tual tual a, Ni engin a rawng a thlak danglam nasa tual tual bawk.

Kawlah a liam mai dawn ta thihah chuan ka va chhuak a, ngai teh, ngaih tur hrelo te tan pawh a ngaih tur zawn tir ruai thei tur khawp hian Lung tileng leh thisen fan chhuak vek tur khawp a mawi hian chu Ni chu  a lo eng sen phut mai a. Mi reng rengte chu, hmelchhe bawk ve taka ka lo ngaih ve thlak ngawt thinte pawh, an eng no sur vek mai!!

Chutiang reng reng a Khawvel mawina pho chhuak a, khawthlang lama a awn ruai ruai mai chuan ka ngaihtuahna thui tak hruai kawiin, a siamtu thenthiam zia min ngaihtuah zui tir zel a.

Mihringte hi thil ngai reng chu nin hun nei hi kan ni deuh vek mai hian a lang a. Kum khat chhunga kan sik leh sa inthlak thinte hi Siamtu ngaihtuah kim zia tilangtu hi ava ni em! Engtik lai mai pawh hian Fur ni ta reng mai se, A va hrehawm dawn em! Nipui te hi kumtluan hian hmang reng mai ila, Khawvel hi ninawm mai ah a chang hma awm mang e.

Thal hun kan hmang a, Ruah tui kan mamawh hunah Fur hun a lo thleng leh a chutiang zel chuan Khawlum leh boruak rit tak kan tawn tlang hnuah Favang leh Thlasik hun, Boruak zangkhai takah kan han inlawm lut leh thin hi chu. Khawvel hun leh Ni te siam a duangtu, Lalpa hi alo va roupui em tih hi ka ngaihtuah ta daih a.

Bairabi to Sairang Relway siamin sawi ahlawh

Tunah hian Bairabi - Sairang Relway siam hna chu thawh mek zel ani a, Compensate in sawi ahlawh tan mek.

Mizo zingah hian awlsam taka sum lakluh duhna lian tak awm hian rinawm lohna nasa takin min thlen mek niin a lang. hei hian kan nihna atarlang thin, Compensate lawm leh duh em em mai kan nihna hian.

Huan/Ram pass na lem a awm nual niin hriat ani a, tunah hian chanchinbu mi lam chuan an ngaimawh tan hle. VC Pass hi 1000 chuang zet mai awmin heng zinga thenkhat hi chu a lem a nih rin a ni. Thuneitu lam chuan Pass lem a awm anih chuan a tul ang zel a action lak an tum thu hi an sawi ri reng bawk a, Pass neitute kohkhawm an ni tawh a, hemi ni hian Aizawl lam atanga lokal mi thenkhat chuan mahni pass chauh nilo Mi chihrang hrang hming a awm LSC Revenue atanga pek chhuah an rawn keng nual bawk a, Application pawh mi pakhatin siamin a mah vekin signature a sign a ni tih pawh hriat ani. Thuneitu lam ten enchiang a, an mahni ngei koh kal theih nise chuan thil a fel theih deuh chu a rinawm.

Tin, ram an nei a ni tih inhrelo, Pass pawh siam chuanglo miin an hming a pass lem an siak sak pawh an awm nual niin alang a, lan ve inringlo tak tak pawh an hming leh an pass alo awm ve nawk mai chu mak an tih thu an sawi bawk.

Hringnun Chapter-4

Thangthar nun ning Thasiam kha lo tho leh se zawng a hrethiam thei mawlh hian ka ring thin lo. Kei nimin maia khawvar hmu a, Nula tlangval te an in ngaizawng thin tih hre ve chauhtu pawh hian ka hrethiam lo tulh tulh, kan hringnun hi. Tunge kan entawn a, enge kan zir le aw.. Thlang sappui nunchan nge kan entawn a, Chhak a Korean ho zawk? Nge A chhe lai apaing kan la lawr zawk le? He mite pahnih pawh hi mak ka tih zualna chu, An photo Clip na hmun hi Kawngpui bul chiah ani a, hetiang a ti ngam chuan a rukin eng ang takin che ang maw tih ka ngaihtuah daih! Mitinte hian zalenna kan nei theuh mai a, mahse, kan zalenna ang hian kan duh duh a kan awm hi a tha ber lem lo hian ka hre thin. Mizo zingah Mahni right hriatna a harh thar mek a. Thalai ten kan tuar mek ani. Tuartu te lah chuan an tuar tih an inhre silo! Kan hnam tan leh An mahni ngei tan a pawi tur pawhin zukawm hreh hauhlo a. Kan ram dinhmun hi ka thlir chang hian Kan hur leh zat lutuk vang hian eng tak ang chho zel ang maw aw..ka ti vawng vawng thin. Hmanni lawk a, naute Pianghlim chhar anihte khan ka rilru hian a dawn thui ngei mai. Duh ngawih ngawih nei thei silo an tam em em lai hian, paih mai mai tur pawh nei thei hi an kuh tul tawh nia, Kartin hian kan veng Hospital te takte ah pawh hian Nau titla hi zuk awm ve deuh reng a!! He Pic a lang pahnih pawh khi an thuam hnaw en khi chuan an tih tur tak an ti ni awm tak ania, nge an tih loh tur an ti tih pawh ka hrethiam ta nek lo mai. hei hi ani maw hringnun chu!!

Kan Mobile Phone hian Thalai nun a ti buai em?

Mobile phone kan neih tan hun kha hun rei ala ni lo a, tunah chuan mitin hian a rethei emaw hausa emaw kan Phone neih hi a chang kang em em vek tawh mai a. GPRS chak takin Mibile service hrang hrang ten an pe chhuak a, GPRS chak hi an inelna pawh ani ber tawh niin alang.

Thalai thawhchhuah, neilo, zirlai leh tleirawl te te thlengin an mahni Phone atangin internet-ah Facebook leh Tweeter an buaipui ta hle mai. Phone an lo sih neuh neuh tawh hi chuan enge i tih ti ila, Fb an tih loh chuan an lo Tweet a ni tlangpui.

hei hian hun tha tam tak a khawhral a, FB ah group tha leh tlawh manhla tak tak tlawh loin, CK(hei hi a awmzia ka hre thiam chiah lo, an lerh a ni berin ka hria) an ti a, Thutak leh buaipui ngai zwng an nun kawng kaihruai thei thilte engmah buaipui hman lekloin an hun awl zawng zawngah tam tak hi chuan an khawih ta niin a lang.

He hmasawnna IT hmasawna hian rah enge a chhuah tawh, a chhuah mek leh eng rah nge a chhuah in rin le. Fimkhur dan leh inven dan tha a awm ang em? Eng ang kawnga inzirtir chi nge ni ang?

Khawih miahlo tura intih chu thil harsa leh huphurhawm tak a ni ngei ang. mahse, site tha tlawh turin ti ila chu pawh chu a huphurhawm hlei hlei mai thei bawk.

HRINGNUN Chapter-3

Thlasikin min kiansan a, hun a kal a, kan ngal chat paw ther thur thinte chu hnum hlarh khawpin thlan leh lumin min chiah tan a. Kha thlasik hun laia, rilru leh ngaihtuahna zangkhai leh thawveng tak thinte kha nguina leh thatchhiatna in a thlak thleng zo leh ta ni ber hian ka hre thin.

Hetiang hian hun hi a kal a, kan hun hman mekte chu an liam a, keini erawh kan liam ve silo. Mahse, he hun hi a liam zel si chuan, engtik hunah emaw chuan keimah zawk hian ka la liam san ang a, Ka hun tawng leh nun kawng zawng zawnga ka thiltihte ang zela rel ska turin rorelna hmaah chuan ka la ding ve ngei dawn a ni tih min hriat chhuah tir thin nia.

I tan leh ka tana tha tura roreltu Pathian chuan a rorel danah hian min rawn ve thin se chuan kan chunga thleng ta lo a tam awm a sin. Mahse, kan chunga a rorelna te chu kan tana tha tur ani ti thin mahse, ka tan hian a thatna tur reng reng ka hriat theih ngailoh tur te leh hun rei tak a ka chunga thil thleng tawh, mahsem ka tana a thatna tun thleng mai a ka la hriat chhuah theih loh pawh hi a awm nual mai nia.

Hringnun zin kawng hi a bumboh a, a chang chuan suar leh tuipui lian tak ang mai a daikai huphurhawm takte an ni thin. A chang chuan chu tuilian chuan min la lek lek a, ka tluk phah fo thin si a.

He zin kawng hi zawh thiam a har a, thangtharte zawh dik atan dah ngawt ta ila, kei hian hma ka hruai siloh chuan tunge ka hnungah chuan chu kawng zawh tura, kawng dik zawka min pen san thei awm ang le.

Engkim mai hi kan ta vek ani tih Bible chuan min hrilh a, ni e, kan ta veka lo ni ngei mai. Hlimna leh lawmna te, lungngaih leh thahna te, hrehawm leh nuam, thihna leh nunna te, natna leh damna te nen.

Kawnpui ah In tam tak tih chhiat mek ani

Kawnpui Silchar Road, Kolasib Distrct a mi chu national Highway 54 Road zauh tur avangin Kawng kama In tam tak chu thiah mek a ni a. Tuna In thiahmek te awmna hmun hi Kawnpui Commercial centre ber ani a. In neitu ten Compensate la tawh mahse, chhungkaw tam tak chuan PWD nen a an inremna chu PWD hian bawhchhia a puhin, an lungawilo hle.

Commercial cente ber tih chhiat anih tak avang hian Kawnpui mipui tam takin harsatna an tawk mek a. Village Council thlengin an rilru a tibuai hle a ni. Sumdawng ten Dawr luah tur neilo in hunkhirh tak an hmachhawn mek a, Mipuiten hmun inhlatlo taka an mamawhte an leikim theih thin kha tunah chuan Hmun inkar hlat tak takah an chakkhai lei turin an thawh chhuah angai a. hei hi Sumdawng ten hmun hnaivaiah dawr luah tur a awm loh avangin, an hmuh chhun chhun chu khawi hmun pawh nise an luah mai angai a. Tunah hian Kawnpui Commercial Centre ber chu Khawram ang mai a, tihchhiat mek a ni.

Hunthar Veng SAY ten Pathian chawimawi dawn

Hunthar Veng SAY Cops chuan Pathian chawimawiin hun an hmnag dawn a, Corps hruaitute chuan tawngtaiin nasa takin Pathian an au a, a hun tur hi Ni 26 March.2011(Inrinni) hi a ni a, Pathian chawimawina hun an hmanna hmun tur hi Hunthar Salvation Biak In Aizawl ah a ni.

Hunthar Veng SAY te hian a tirah Rs.500 chuah neiin Pathian rinchhanin bul an tan a, tunah hian mi thahnemngaite atanga an thawhkhawm nen Rs.20000 lai an nei tawh a ni.

Kumin chhunga tih hlawhtlin ngei ngei tur Project Rs.15000 sen ralna tur an nei chung leh member active 25 vel chauh nei chungin Pathian chawimawina hun hman hmasak phawt hi an thlang ta a ni.

Pathian ropuina a lan ngei beisei chungin i tawngtaipui ang u.

Hringnun (Chapter-II)

Hringnun hmang tura khawvel tukverh a kan dah chhuah ve ni khan mittui karah tap chungin kan lo piang chhuak ve a. Hlimna leh lawmna tam tak karah lungngaihna leh manganna ten min chim buai bawk thin. Hringnun hi hman thiam a har a, ke chheh a rem hleithei thin lo.


Thatlai hun kan chen a, kan chenna lama hringnun hmabak zawng zawng pawh chenral ta sawi tur lah kan awm teuh si a. Ka nun hi keima thu a ka ka duhna lam hawi a khalh tur leh khalh kal thei ni mah ila, ka duhna hmun leh hunte chuan minlo hnarlo mahse, ka tan erawh tahna leh mittui far tura min tur luitu an lo ni fo thin.

Vanglaini nuam taka hmang tur erawh chuan duhna lian tak thinlungah kan kawl theuh a. Mahse, kan chak zawng leh nuam tih zawng ngawt hian hringnun hi hmang ta ila, i tan leh ka tan hian hmabak thim leh eng reng rengin a chhun tlang zawhloh hun khirh takin min lo hmuak thei si!


Hringnun kan hman ve nana Siamtu'n i tan leh ka tana hun min pek hi kum a ral a, hun a inher zel ang hian a ral ve zel a, Khawvelah hian kan chamrei zawh poh leh engmah titheilo leh mahni pawh in saseng theilo a, duh leh mamawh chauh sawi thei a kan awm hun hi alo la thleng ngei ang.

Aw.. chu hun chuan min nangching ang a, kan tan khawvel hi a lo thim ang a, tar vun chuar leh tih theih neilo kan lo nih hun chuan vanglai nun ngaiin hringnun kawng hi a bul atanga tan that a, zawh that leh ava chakawm dawn em? Chutih hunah chuan, theih nise, bul tan tha leh dawn ta la, i vanglai hun tuna i hman dan khan i hmang ral leh duh ang em le?

I tum i thelh mai lo maw?

Kum 10 kal ta ah kha chuan ruihhlo chitin mai nen nun hlimna zawngin ka phe buai ve hle thin. Mahse, chutiang ringawta awm tur chuan duan ka lo ni hauhlo a niang chu. Ka(n) innghahna ber mai kan Dawr neih chhun ve chu Phai Vai hoin min rawk sak ta mai a le. Kut bengin kan awm ta a, hah taka ka Nu leh Pa te thawh chhuah ka lo chen ve ham ham thin chu hmuh phak leh beisei phakah a awm ta lo. Karlo ah min kiam san zo ta.

Kum alo vei alo vei a, ka inngaihtuah nasa thin a, Chhandamna Campingah pawh lut lemlo in keima tawk tawk chuan Pathian ka au a, Siamtharna Pathianah ka chang ve ta nawlh mai. Mahse, ka zawh tur kawng ka ngaihtuah a, ka huphurh thin.

Kan khawsak lah chu alo harsa nasa tawh mai a, kan harsa tih piah lam a ni awm e. Tlai lama chaw chhum tur pawh ngaihtuah fe tham a tling ta tak zet alo ni a. Inkhawm nan thuamhnaw engmah ka lo nei bawk silo, a thar lei lah chu vana rah ang mai a ni si!

Kohhran inkhawm nuam ka ti em em a, KTP Programme engkim mai chu hmaih hauhlo in ka tel ve reng thin a. Mahse, KTP member-te chuan thuamhnaw changkang leh tunlai a an uar ang apiang mai hi inbelin an mawi thei thin si a, thiante Kawrchung hakte chu awt takin ka thlir ka thlir thin a. A chang chuan Revival Speaker pakhat zuiin an rawngbawlna ah ka kal ve thin a. Mahse, Ka mutbu telna tur leh ka thuamhnaw khungkhawmna tur takngial pawh engmah neih ka neilo a, mi ta ka hawh khawm thin. Rawngbawla zin chhuah chu ka chak em em thin a, mahse, kal dawn zan hi chuan ka mittui a tla fo thin. Keimah ka inkhawngaih thinna avangin, leh ka rualawhna avangin.

Mite hian min ngaisang lo em emin ka hre thin a, min ngaisanglo satliah lo a,min hmusit tih ka hre thin in ka hria! Pathian hnenah ka tawngtaia ka dil fo thin chu, “Lalpa, i rawng ka bawlnaah hian miten ka thusawi an ei zawk theih nan leh nangma tana ka thawh hlawk zawk theih nan, kan chhungkaw khawsak dinhmun hi min chawikang ve rawh” tiin.

Tunah chuan ka dilfo thin kha a chhanna ka hmu ta a, mite tluk phaklo mah ila, khang hun ngaihtuah chuan tunah hi chuan ka duhthusam kha min pe tawh a ni.

Mahse, khang hun laia Ruihhlo ngai ten keimaha hmun an chan ang kha an chang phak ta lo a, Kohhran laka pangchang tlaklo an pangchan si ziate, Rawngbawltute laka phut sang tlaklo tak ni si a, an phut san si ziate hria a, an mahni hrethiam em em thin kha ka lo ni ta hauhlo mai. Hriatthgiam a hnekin, tlem a kamnam deuh chunga KTP Programme a an lo tel pawh ngaimawh hialtu ka lo ni ta.

Mahse, he thu hi ka hre chhuak, nilo, ka thinlungah chiang takin alo lang ta:
“Chutah chuan Juda mi a awm theih loh va, Grik mi pawh a awm theih hek
loh, chutah chuan bawih a awm theih lo va, bawih lo pawh a awm theih hek
loh, chutah chuan mipa leh hmeichhia pawh a awm theih loh; Krista Isuaah
chuan in zain pumkhat in ni si a” (Galatia 3:28) tih leh
“ “Riangvaite hnenah Chanchin
Tha hril tura mi ruat avangin
Lalpa Thlarau chu ka chungah a awm;
Ani chuan salte hnena chhuahna thu leh,
Mitdelte hnena mitvar neih lehna thu sawi tur te,
Tihduhdah tuarte chhuahtirna tur te,
Lalpa lungawi kum thu sawi tur tein,
Mi tir a ni,”
tih hi. (Luka 44:18&19)

Tumah inthliar hrang tur kan nilo a, Rawngbawltute nunah leh kan rawngbawlna ah hian heng mite leh mitu pawh mai hi an leng tur a lo ni. Chuti a nih loh chuan Lal Isua rawngbawl hna chhunzawmtu inti si hian, A rawngbawl dan kalsanin, kan duh danin thahnem ngai takin rawng kan bawl ang tih a hlauhawm thin in ka hria. Lal Isua hniakhnung zui a rawngbawl tur kan ni si a.

KTP ROREL INKHAWM TLUANG TAKIN HMAN A NI

Central KTP rorel inkhawm chu Bethlehem kohhran Biak In ah tluang takin hman mek zel a ni a. Nizan atang khan Pathian biak inkhawm neih tan a ni. Rorel palai hi Bial tin aiawh pakhat theuh leh Branch tin aiawh pakhat theuh an kal a. Palai bethlehem a riaklut hi mi 300 chuang an ni a, hei bakah hian palai khual atanga lokal thenkhat chu Aizawl veng dangah an innghat hlawm ni a hriat a ni.

Vawiin chawhnu dar 1:30 atanga tlai dar 4:15 thleng vel khan rorel in hun an hmang a, kum dang zawng zawng aia Agenda tam ber tum a ni. He rorel inkhawmah hian CKTP in hun rei tak alo buaipui tawh Youth Recreation Centre cungchanga hmalakna chu tih tawp leh a hmun sawn rawtna Bial engemaw zat atanga lut chu Central KTP in lo zir chianga a hmun sawn leh tihtawp a tul pawha tih tawp thlenga mawhlo phur turin tih a ni.

Rorel zawh hian rorel palaite pualin a thlengtu Bethlehem Kohhranin ruai a buatsaih sak chu kilho a ni.

Zanin atanga naktuk zan thlengin inkhawm programme a awm chhunzawm anga, naktuk zanah a tiak ang.

Tin, kumpuan thupui atan Isua nen tih hman turin thlan a ni bawk.

Hmeichhia ten nemngheh(Ordain) Minister neih an duh

Ni3.March.2011 atang khan Presbyterian Kohhran Hmeichhia te chuan Kawnpuiah Inkhawmpui Lian vawi 44-na an hmang tan a. Naktuk Ni 6.march.2011 (Sunday)zan hian a tiak ang.

He Inkhawmpui hian Nimin(Ni 4.March.2011)Ningani zing dar 6 atang khan Kawnpui Hmarveng Kohhran Biak In ah Inkhawmpui Committee an thu a. Rorel palai 386 te chuan Hmeichhiate Ordain Minister neih ve an duh. Ramhlun ‘N’ Bial atang thu lut “ Presbyterian Church Of India hnauaiah lo hian Hmeichhe Theology Degree nei, a awm leh phute chu Pastor/Minister atan nemngheh (Ordain) theih ni ve rawh se” tih agenda chu sawiho a ni a. Rorel palaite hian hethu hi lungrual takin an pawm tlang a. Senod Executive Committee-ah thlen nise an ti.

Sawihona lamah Central Kohhran Hmeichhe hruaitu pakhat chuan, "Mizo hmeichhia zingah mithiam tak tak, rawngbawlna pawimawh taka hman an tam tawh a; kan rawngbawlpui Kohhran ten Nemngheh an neih theih tawh laiin Presbyterian Kohhran hian Hmeichhia kan nemnghet ngai lova; Nemngheh leh nemngheh loh hi Kohhran anga rawng kan bawlpui ten an ngaihdan a danglam thin a; kan Kohhran ah pawh hian a tul tawh a ni" a ti.

Thurel langsar zingah Bial Buhfaitham Ziaktu Term kum hnih ni thin chu Bial Puipa te Term anga kal rawtna te; Bial Hruaitu Nominate Kohhran tin inzat theuha siam aia Kohhran member zira siam rawtna te chu Synod Executive Comt ah thlen te; Bial Hmeichhe Inkhawmpui hun inang hman te; Women Centre Special budget atana cheng Nuai 7.2 dah te an passed a; Inneih sawngbawl dan hautak lo chungchang sawihona chu Synod Social Front hmalakna zawm turin an inchah a; Mizo hmeichhia te incheina chungchangah pawh Synod thuchhuah behchhanin Central Committee in hma la se an ti bawk.
Rorelna Floor ah hian Pastor Bial 16 te thu theh luh chhawp chhuah a ni a; Bial 20 te thu thehluh erawh chu Central Comt in hrilhfiahna siamin Floot ah a chhawpchhuak lo.
Kum 2011 - 2012 chhunga Kohhran Hmeichhe budget atan cheng Nuai 26.45 an Passed bawk. A hmanna tur pawh an siam nghal. Nizan Inkhawm ah Jubilee hawnna neih a ni a; Vawiin chawhma khan Jubilee Pual inkhawm neih a ni a; Synod Moderator in Mizoram Synod aiawhin present a hlan.
Hruaitu thar
Central Hmeichhe hruaitu
Chairman : Pi Laltlanmawii Chanmari Bial, Synod ruat
Vice Chairman :
Pi Khawlvuani, Hlimen Bial
Gen Secretary : H Lalpianthangi Asst Coor Synod ruat
Asst Secretary : Pi Laldawnkimi Ramhlun Bial
Treasurer : Pi Lalsawmliani Bawngkawn Bial
Fin Secy : Pi Liankimi Missionveng Bial
Mikhual zat
Reception lamin an chhinchhiah danin, vawiin Dar 2:00pm thleng khan palai 40000 an tling tawh a ni.

Tunah hian Palai hi an lo la thlen belh zel a, beisei dan chuan Pathianni(Sunday) hi chuan palai 5000 an chuan beisei a ni.

Hringnun (Chapter-I)

September thla hi chuan khua a thiang nuamin, nipui boruak rit leh up lutuk pawhin min kian san tan tawhin, boruak a zang tan tawh hle thin a, mitinte rilru pawh a zangkhaiin, mihring nun nguai pawh a harh tan hun lai a ni tawh thin.

Khawvel mihringte hian he kan zinna hmun, zinkawng khirhkhan leh harsa tak hi kan zawh dan a inanglo in, zin mite theuh theuh zingah hringnun hi hriatthiam tum a bei ngial te leh hriatthiam loh ang ang a, chianglo taka hun hmang ta kan awm awm e. Kan hun tawng leh hmabak lah inanglo tak tak kan ni nawk hlawm a, kan bul tanna leh tawpna tur erawh a in ang khat tlang vek lawi si.

September Ni 30, 1980 a nih khan ka nu pum ata lo piang chhuakin, he hringnun zin kawng bumboh tak hi zawh ve a, harsatna leh lawmna tam tak tawk turin khaw eng ka lo hmu ve tan a. Khami ni khan ka Nu leh Pa te tan chuan hlimna nasa tak thlentu chu ka va ni tehlul em. Thinlung chhungril taka hlimna nasa tak nen min lo hmuak a, Mahse, chutia, min hmangaihtu te hlim taka an nuih a, an lawm em em lai chuan an hmangaih erawh chu ka tap si! He ka hringnun zin kawng alo tawp hunah, ka chatuan hmun tur pan a, hringnun zin kawng ka zawh chhunga ka thiltih lawmman hmu tura ka thlarau lak a nih hun chuan min hmangaihtute chu an tap leh lawi si ngei ang. Hringnun mak tak zawng a ni phawt mai.

Kan goal ah lut dawn teh ang. Chutia min hmangaihtute tana an lawmna leh hlimna ber thlen saktu ni a ka lo pian hnu chuan ka nun chu keimah ngeiin ka pal chhoh a ngai ta. Min hmangaihtute mit tlung tak leh lawmna thlentu nih chu ka duh ber a ni fo thin. Mahse, chu ka zin kawng chu a kawngte alo rualremlo in a lo chhuk chho em em mai si a. Chu ka zin kawngah chuan harsatna nasa tak ka tawk ta, chu chuan Pathian min hnaih tir a hnekin amah hlat takah min awm tir ta zawk a, chumi avanga ka zinkawng ka zawh dan ka thlak danglam takna chuan min hmangaihtute chu na takin a vaw let a, an hlimna leh lawmna ber ni thin chu an natna ber thlentu, leh hrehawm taka siamtu, lungaihna nasa tak thlentu-ah a chang zo ta!

He hringnun zin kawng i zawh chhung hian hlimna leh lawmna nasa tak i tawk ve ngai em. Hun tam zawkah chuan khawvela kan hlimna leh lawmna ber berte hi kan lungngaihna nasa tak min thlen saktu ah an chang leh thin. Lawmna nasa tak a lo thlen rualin chu chuan harsatna lian tak a rawn keng tel fo thin.

Chuvangin, harsatna leh manganna i tawh changin, i la famkim lo a, i zin kawng mai chauh i zawh a ni tih chu chuan hriat chhuah tir thin che sela. I zin kawng tawp hunah i veng leh khua kumhlun tur, chatuana i awmna hmun tur i la pan dawn a, he i zinna ram a i cham chhung a i thiltihte ang zelin i awmna hmun tur rel sak i la ni dawn a ni tih theihnghilh suh ang che.

Happy Valentine's (Ka dy ka bawih Mampui)

Kum alo thar a, hmasawnna engemaw tal ka nei ve ngei tur a ni ti a ka in tintuah rauh rauh laiin, hei, hmasawn a hnekin ka haihawtna te pawhin min kian san ahnekin zual lam a pan mek zel chu anih hmel hi! Kum tin a ka hlut ve em em thin valentine’s Day pawh ka lo hre chang tawhlo tep a nih hi! A ni alo thlen hmain Valentin’s Day chibai inbuk nan aw.

Engtinnge ni khah?, Tracy Zorinsangi hlasak ah khan “Aw thinlai ruk a dam thei lo, Dy nunhlui dawn kir changin..” Aw a ni tak e, nunhlui ngaih leh lunglen hian duh tawk hun hi a nei thei dawnlo a ni awm mng e, kum atam tual tual a, nunhlui theihnghilh tumna nasa tak nena ka beih chiam pawhin a sawtlo, a thlawn mai an ni. Nunhlui neilo hringfa piang chhuak zingah hian an awmin ka ringlo, chung kan thatlai hun leh nunhlui mualliam hnute chuan kan vul lai hun min ngaih tir a, tahkhua a sei, a sei thlawn mai thin anih hi!

Valentine’s Day hi engatinge ka hriat reng fo thin a, ka hringnunah hian engvanga lian em em thin nge a nih le? Mite’n an hman dan leh valentine’s Day lo chhuah chhan lam erawh ka ngaihtuah lemlo a, ka hriat rengna chhan tur erawh tu min hrilh ngai hauhlo hian chiang takin ka vawng reng thin.

Kum tam tak chu a liam tawh a, kha hun pawh kha a liam tawh a ni tih theihnghilhlo mah ila, khami kum Valentine’s Day alo thlen hun kha ka nghakhlel em em a, a chhan pakhat chiah a awm, chu chu, he Website ah ngei ka rawn mualpho pui tawh ka High School kal laia ka Dy, ka bawih mampuii khan thinthawng dawt klhawp a, rang leh inringlawk hman leklo hawilo par chu thliak a, Lungloh tui dawn a rihsang mual min liam santu ***Te-i’n Valentine’s Present min hlan dawn vang kha a ni.

Kha ni kha ka tan chuan nghahhlelhawm tak ni mahse, a hun leh ni a lo thlen meuh chun ani chuan mual a lo liam tawh a, au mah ila, min hawi leh tawh silo. Thihna kut vawt chuan hneh takin a hruaibo tawh si a!

Khami kum khan ka hlimna tam tak min thlen a, January thla chhung kha khawvela ka nun kawng hlimawm berte zingah tun thleng hian ka chhiar lo thei thin lo. January thla atang khan Valentines Day lo thleng tur kha kan urlawk dun tawh a, chumi ni a lo thlen hun chuan Present kan inhlan ang a, kan present inhlan tur chu, keiin a ngainat em em Hanky sen lar tak ka hlan ang, a ni chuan lehkhabu a zawnga ngaihnawm ka tih leh mi ta hawh a ka chhiar fo thin, The Count Of Montecristo bu chu min hlan dawn a ni.

Mahse, chung zeldinna leh kan duhthusam te chuan engtikah mah a tak ram thleng dawn tawhlo mahse, Hmangaih taka ***Te-i lo chawi liantu a Nu leh Pa te an la dam a, he niah hian ***Te-i hriatreng nan an hnenah Present ka hlan thin a, Kuminah hian ***Te-i ngainat em em Hanky senlar tak mai chu a Nu leh Pa te hnenah hian ka hlan dawn a ni. Chu chu ka hmangaih tana he khawvela ka tihsak theih awm chhun chu a ni tawh si a.

Khawvel hian hlimna leh lawmna nasa tak min pe thin mahse, chumi rual vek chuan chu kan hlimna leh lawmna ngei chuan lungngaihna leh tahna hmunah min hruai leh fo si thin.

I tello chuan hringnun hi a famkim thei lo a, hmalam pan tur tumna ka neih changte hian, ka ke chheh tin maiah hian nang i awm em tiin ka zawng zel thin che a sin. Mahse, ka tana Hmeichhia nih tling tak kawppui min petu Pathian hnenah lawmthu ka sawi e.

Valentin's Day lothleng tur hi beidawnna thlentu nilo in i tan lawmna ni lo ni se tiin chibai ka buk a che.

Centenary kan lawm sual maithei

January Ni 21 - 23.2011 chhung khan Kawnpui Pastor Bial KTP Conference hman a ni a, he Conference rorel te zinga pawimawh tak mai chu "Kut bul kaia missionary-ten mizoram leilung an rahna hmasa ber hi Bial KTP hmingin tlawh chhuah ni rawhse" tih a ni.

Zosap Missionary ten Mizoram an lo rah tan ni chu Christian-na lo luh champha ah ngaiin Mizoram Christian-na lo luh atanga a kum 100 na (Centenary) chu 1994 khan kan lo lawm tawh a nih kha. Mahse, Kawnpui Bial KTP ten tuna an tlawh chhuah tur hi Mizoram leilung Missionary ten an lo rah hmasak ber na hmun niin a lang a (Kum leh ni hi ka chhinchhiahna a bo ta daih mai rem changah ka rawn tar lang leh ang a). Chuti chu anih chuan Centenary chu 1994 hma fe khan kan lawm a tul zawk tihna a ni ang.

Hei hi Mizoram History ti danglam dawrh thei thil a ni a. Kawnpui Bial KTP hian han tlawh chhuak phawt mai sela, Mizoram Synod hian engtinnge a tih ilo thlir phawt mai teh ang.

Rintlak loh mihringte

Theih ang tawk tawkin mahni dam khaw chhuah theina atan tiin hma han la ve thin mah ila, harsatna leh manganna, chhiatna leh lungngaihna te hian englai mai pawh hian min chimbuai reng fo thin. Hetih hunah hian mihring kan nihna a in a kentel ani tih hi pawm thiam hi a harsa thin ngawt mai.

Kohhranah rawngbawlhna thawkin theih tawp ka chhuahpui thin zingah ngei pawh chutianga hun harsa leh hun khirh ka tawn lai chuan ka hnena min tanpui tura lokal hmel ka hmu ngailo a, ala mualpho dawn a ni tiin min en em ni aw ka ti thin. Tin, ka chaklohna te hian keimahah harsatna min thlen ve fo thina chung hunah chuan rawngbawltu tha tak takte chuan a rukin minlo sawi sep sep thin a lo ni.

Chutiang khawvel bawlhhlawh tak mai a cheng ka nihna chuan ka nun a khalh kal a, ka chaklohna chu ka chakna alo ni leh thin.

Hun harsa leh hun khirh tak karah pawh Pathian chuan a hmel duhawm tak min hmuh tir thin a,ka tan a rinawm reng thin. Mahse, a rawngbawltu ka rin em em te chuan min phatsanin, min sawi chhetuah an tang zui leh si thin.

Ka tlin lohna te hian tling turin min pui thin a, ka chak lohna te hian chakna nei turin min pui a, ka tluk thelh thleh a, ka petek tep lai pawhin Pathian rawngbawltu inti te hian min nuihzatin, ka hnung lamah ka chhiatna lai chu mak tiin sawi thin mahse, Lalpa erawh chu ka lamah a tang reng thin a, hnehna nei turin ka lamah a ban alo phar a, a kut chak tak chuan "Lokal rawh ka kai ang che" tiin ka kut a chelh tlat thin.

Mihringte ah hian beisei tur leh innghahna tlak an awmlo a, Lalpa erawh chuan ka nun zawng zawng siamtha turin min pui a, chak lohna leh kawng peng thuama zawh tur zawk hrelo a ka din reng lai pawhin, kalna tur min hrilh turin hmanhmawh takin ka hnen lam panin min pui thin. A hnenah chuan lawmthu awm rawh se.