Mihuaisen aia huaisen chu

Kum tlem a zawng chu a ral ve tawhin ka hria, kan tlangval ve hunlai kha chuan insual huai tak mai kha nih a nuam a, nula ten min ngaisang a, khawkhat insual huai nih chu mipa te duh thusam a ni ve thin in ka hria.

Tichuan, kan veng tlangvalah kha chuan insual huai ti a sawi...oh.. nilo, insual hrat ti a sawi kha kan ni ve thin a, kei aia lian tak tak hmaah pawh khan ka zam teh chiam ngai hian ka hre thin lo. A hnuai zawka tang mah ni ila, an tlawm hun nghakin theih tawp chhuah kha ka duh tlat thin.

Veng chhak lama tlangval te tibuai tur ngawt a tlangval a pumpa han thawh chhuah thin kha chu huai thlak ve deuh chu niin ka hria...Nilo, a atthlak a ni zawk e.

Kum tlem a zawng a lo her liam a, nupui te neiin chhungkua ka han din ve a, chutia tlangval laia huai inti ve thin khan ngam loh lian tak, nilo te takte ka nei ta tlat mai. Palian leh te hmaa tlawm ngailo chuan a hmaa huai theih miahlohna a tawng ta!

Eden huana Adama ngam loh hmeichhia kha ka tawng ve ta, ka bula nui har har paha a sawi chu tih ngei ka duh tlat thin a, lungawilo tih hriat deuh a mit mei min han hmuh liam puat changte hian enge ka tih dikloh tih ngaihtuahin ka buai thin.

Hla pahnih pakhat hi

Heng hla pahnih te hi in lo khaikhin ve atan ka han chhawp chhuak ve ngawt a.

A hmasa zawh hi Sap hla (English) a ni a, a hnuhnung zawk hi Mizo tawnga an lehlin a ni a, an sa nalh ve ve khawp mai.

Hei hi a english zawk chu a ni a, Ori zawk pawh a tih theih tho ang chu.
http://www.youtube.com/watch?v=J4xm2mtDj2c

Hei hi a mizo version zawk a ni a, a lettu hian a let thiam hle in ka hria, tin Sap hla mizo tawnga dah tur hian Mizotawng thiam tak nih a ngai a ni tih alang chiangin ka hria. Tin, a zai a te hian an thiam bawk a ngaihthlak pawh a nuam, mahse, Voice editing hi an uluklo mah mah em aw ka ti deuh a, Voice effect a tam mah mah niin ka hria, chuan effect an hmanna laiah hian Zaithiamte aw hriat chian a har zual Original zawk nen hian han ngaithla duh chhin ula.
http://www.youtube.com/watch?v=sIYr9YHR2Rg

He music Video hi a quality a tha a, Mizo kut chhuak Video ah chuan chhuanawm pawl tak a ni ngeiin ka ring. Recording lam hi uluk deuh ni pheise, a zahpuiawm loh viau mahna tiin ka ngaihdan nen ka han thai kawi ta niaih a nih hi.

Video upload turin ka Net a muang bawksi nen ka rawn Link ta mai a, inlo en peih em ang chu maw.

Masi ka nghahhlelh thin kha

A nia sin, khang hun lai kha chuan thil dang leh hun dang zawng zawng ai hian alo thlen hun hi ka nghakhlel thin. Mahse, kum khat teh meuh mai nghakhlel taka lo hmuah chu a rei duhin, bei a dawng lek lek thin.


Masi lo thleng tur hi nghahhlelhna chhan ka nei thin, a hmasa berah chuan School kan chawl dawn a ni. Nia, kum tluanin nitin mai Sikul fawm nen hmanhmawh takin Sikul lam ka pan hnak hnak thin a, Ka Sikul kal Ipte pawh ka Pa in uluk taka ka Sikul Fawm kekawr bang a min thui sak ngat a ni. Sikul kal chu ka nin tawh tehreng nen, ka thiante aia ka thiam har thin avang chuan kan Zirtirtu nelawm loh zet zette chuan min hrem fo thin a, ka sual vanga ni lo a, ka pianpui rilru chu a chak tawk loh vang mai a ni. Chutiang a Sikul kal reng mai chu ka ning satliah lo a, ka kham tak zet. Masi alo thlen hun chuan Sikul kan chawl ang a, ka Zalen tawh dawn a ni.


Pahnihna ah chuan, Masi kawr thar ka nei dawn a ni. Ni e, chhungkaw hausa tak kan nih loh avangin ka Pa nitin puanthuina atanga a hlawh chu kan ei ber a ni thin a, chutianga Fa 4 ngawt mai Sikul kaltir chung chuan Chawhmeh a tha theilo a, kan ei tawk tawk a ni ber mai. Chutih laia kum laklawha kawrthar lei chu danlo a ni tawp mai. Ka beisei phak ngailo. Mahse, Masi hunah chuan ka Unau te nen mipa zawng chu inang thapin kan kawr leh kekawr tur puanthan min lei sak ang a, ka Pa in uluk takin min thui sak leh dawn a ni. Chu ringawt pawh chu kei naupang chhia tan chuan thil nghahhlelhawm tak chu ava ni thin tehlul em.


He chhnadamtu pian cham lo thleng thin hian ka tan chuan malsawmna ava thlen nasa thin em! Ka tan chuan hrehawm tinreng, ka nin hluah hluah thin leh ka neih loh, ka awh em em thinte laka min chhandamtu a ni thin.


Tun thleng pawh hian he hun alo thlen dawn hian ka hre chhuak thin, ka Pa in kan Unau thuamhnaw man tur Zing ni chhuah hlim atanga tlai khawthim thleng rak rak a a thui hnuah, kan thuamhnaw ve tur Urlawk zan a min thui sak thin kha. Ka nu in thingpui sen a siam sak kha phur takin ka pe thin a, kan Unau za chuan ka Pa khawl bulah hlim em emin kan lo kil ve laih thin a.

Christmas rim a nam, in veng ru

Kumpui sul meuh alo vei leh dawn ta reng mai, kumthar lawma ruaipui kan khuk pui luih luih lai hun kha nimin ral ta ang mai hian ala thar reng a sin mawle. Mahse, thil thar pawh hi a thar dang alo awm chuan a hlui an lo chang zo thin a nih hi, kumhlui tiin kan thlah liam leh thuai dawn a nih hi le, damte a kan thleng te a nih ngawt chuan.


Kohhran in Programme chihrang hrang a duang leh ngei ang a, nu leh pa tam tak chuan chu hun hman loh hlauin kan fate hre changlo lekin zaikhawmna lamah kan inhawl kal tlauh tlauh ang a, in lam leh kawtlai lamah kan fate erawh an lo rui thle bak bak mai ang em le?

Heng ang hi kum tin mai hian thleng tawk a awm fo ngeiin ka ring thin. Hlimna leh lawmna hun tur hian lungngaihna min thlen mai loh nan kan tu kan fate khawi hmunah nge an awm? Engnge an tih tih hi i ngaipawimawh ber ang u. Tleirawlte tan nu leh pa awm loh tam ber hun lai chu chance tha ber alo ni ve bawk a, hun danga an tih ngai loh leh tih duh loh thin te pawisak lohna an neih awlsam em em hun a ni tih hriin, mahni fate theuh venghim turin theihtawp i chhuah ang u hmiang.

Thilsual tih ching leh ruihhlo ngawl vei ta te bul tanna hun chu Lal thar Chhandamtu pian cham lawmna hun kan hman lai hian alo ni ve fo bawk.

Heng hi hria ila, Kohhran a hlim taka Pathian kan fak lai hian kan hnenah kan fate i hruai ang u, kan hruai theilo anih chuan, In lamah i uap lum mai zawk ang u hming.

A thiamna leh finna a petu tan-Lalnunpuia Hrahsel

October Ni 26 zan khan Kawnpui khawchhuak, Upa Lalhmingmawia(L)Kawnpui Hmarveng fapa, Lalnunpuia Hrahsel chuan Mizoram a la tih ngai loh thil ropui tak min hnut chhiah a, a thiamna leh theihnate, finnate petu a Lalpa tan a thlawnin Music Video a siam chu tlangzarh a ni.

Via http://www.lawrkhawm.com/index.php?page=21814
He Music Video tlangzarhna leh hlanna inkhawm hi Pu Rammawia(Mizo Idol Judge) khan a kaihruai a, Mizoram Synod moderator in a tlangzarh. Tin, tlangzarh inkhawm hi Zonet Cable Network Studio ah hman a ni a, Zonet hian Live in a pechhuak bawk a ni.

Lalnunpuia Hrahsel hi Kawnpui khawchhuak zingah chuan a ngaihsanawm zualin, a thiamna te, a finna leh theinna te a petu Lalpa tana a thlawn a a hlan hi a ropuiin rawngbawlna rilru tak tak nen lo chuan thil harsa tak a ni ngei ang. Lalpa tana thahnem ngai leh a thil neih engkim hi Lalpa pek a nih zia a chiang em em mai hi a ropui a. A hla te pawh tun atangin an lar em em tawh a, Zoram pumpui mai hi min fang chhuak a ni ta ber mai. Nasa zawkin Lalpa'n a thiamna leh finnate tih pun sak mawlh rawh se.

Via http://www.lawrkhawm.com/index.php?page=21814
A hlate hi a thiannu Madawngi'n a sawi danin hun harsa leh khirh tak a tawn changa a phuah a ni hlawm a, Zan rei tak tak a a phuahte pawh an ni hlawm.

He music video ah hian hla 14 lai a awm a, a ma phuahte vek an ni a, hla tha leh ropui tak tak, a thluk leh music arrange-te pawh belhchian dawl tak an ni deuh vek a, a satute pawh Zorampum huap pawh a Zaithiam lar leh tihtak takna nena Lalpa fak thin mi an ni.
1. Shema - Pensy
2. Ifak ang u - David Lalfakawma
3. Van ruahtui - Tetei Ralte
5. Krista mo - Emily Vanlaltluangi
6. Beramno lenna - TBC Zaithanpuia
7. Saruangah min siam rawh - Pensy
8. Ka kal thiam lo - Baby Malsawmtluangi
9. Khaw lo la awm tur - Michael VL Rema
10. Hero to Zero - Zohmangaihi (Tetei) Myth Of Faith
11. Isua pan thuai rawh - Valte, Zohera, David & Reuben
12. Rabboni - Pensy
13. Hmanhmawh rawh - Joseph Zaihmingthanga
14. Isuaah chauh(Lehlin) - Luangmual Vengthlang Kohhran Zaipawl Feat Artist

Heng hlate hi a en duh leh ngaithla duh tan http://youthim.com/index.php?phek=down&cid=4 ah hian download theihin upload vek an ni tawh a, kan sawi tawh angin hralh tur a Music Video album hi buatsaih anilo a, Lalnunpuia Hrahsel hian a thiamna petu hnanah a pek let a ni a, a thlawn liau liau a thehdarh tura a tlangzarh a ni.

Tin, Kawnpui a Computer hmanga hnathawk mek Newworld Compugraphic-ah a duh apiang tan a thlawnin Phone ah emaw CD ah emaw dah tir theih reng ani e.

Lemchanna platform

Holywood star, Korean Star leh Bollywood Staring-te hi lemchan khawvelah chuan kan hriat lar leh Mizoten tun dinhmuna kan ngaihsante an ni awm e. Ngaihsanawm loh tak tak leh hlawhtlinglo ve fe fe pawh sawi tur an awm teuh mai. Engpawh nise, lemchan thiam takte hi chuan mi tam tak ngaihsan chu an hlawh hrim hrim thin. Mahse, hlawhtling hle mahse ngaihsan loh deuh mai ka nei ve a.

Khawvel hi khawvel anih miau avang hian mipui kan thuhmun fo theilo, dam leh damlo an awm a ngai a, a tak leh a lem pawh. Tichuan lemchan thiamte chu kan ngaisang a, kan ngaisang ta mah mah emaw ni chu a ka ti thin.

Kan ram chhungah han lut ta ila, Mizoram Politician-te atang hian han hrut mah teh, Bollywood staring lamah inziak lut mai se tih ka ngah mai. Politics hi lemchanna platform emaw an ti ta mai. Lem an chan thiam poh leh hlawhtlingah zuk inangai ia!! Mipui bum nan an hrawk hrui hi Pathian hian a ti chak mah mah nite hian ka hre thin. Mahni tanghma hai reng reng a buai, ram hmangaih em em anga lan tum Lemchan thiam ho hi ka ning hluah hluah thin.

N.G.O. lam han hrut leh mah teh. Tunhma kah chuan N.G.O. hruaitu nih hi tlawmngaih chhuah a chelh kha an ni thinin ka hria a. Ngaiteh, tunah zet zawng, Central hruaitu thlan kum chuan Candidate-te campaign khap a ngai ta hial nia!! N.G.O. hruatu nih chak a vir vir hote hian Lemchanna dawhsan emaw anti em ni le? Mi hruana hnuaia thahnem ngai taka thawk duhlo, thuneihna duh, hruaitu nih chakte hi ka ning hluah hluah.

Kohhran lam han thlek ve leh mah teh. Pathianram thawh hnem leh Officer lian te tan Inrinni zan Sermon hun chan chu thil harsa a ni ta hauhlo. A nei nung nungte tlaktlumna hmunah kan siam tan mek ta em ni? Eiru tun tun chunga mirethei zawkte eizawnna neilo Zu zuar ta maite na tak taka dem ngam pawh Pulpit chuangkai thei chinah hian kan kawl tun tawh mai!! Kan Lal Isua erawh chuan hmeithai dar tangka dere thawhtu pawh a ngaihlu zawk hle si a. Kohhran hi lemchanna dawhsan a nilo tih hi hrilh hrep mai ka chak thin. Mahse, kan Kohhran hruaitute mitmei ven tel a ngai ve tlat bawk si.

Heng lemchan thiam ka sawite hi an hlawhtling thin khawp mai. Mahse, mi hlawhtlingte zinga ka ngaihsan lohte an ni. Heng mitehi Hollywood leh Bollywood lamah i um lut vek mai ang u.

Mobile Tower vangin Khuai an buai?

Thiamna leh hmasawnna a pung chho zel a, ram kilkhawr berte zing ami pawh ni ang hmiang, European ho dak rualin kan dak ve thei tawh a, chuchuan kawng tam takah hmasawnna leh awlsam zawkna chu min thlen mek a ni.

Chutih lai chuan, Mobile kan hmelhriatna hi lareilo tak ni mahse, Khuai in kan velah hmun an chang tlem ta hle niin ka hria. Hman ni kan thianpa Environment&Forest Dept. a thawk nen kan inhmu a, a ni chuan Khuaite hian Mobile Tower atanga Signal chhuak hian Khuai antena(Ti mai ila, an thil hriatna)an lu a samzai ang deuh pahnih chhuak hi ati buai a, hei hian khuai a ti rem nasa hle in an rin thu min hrilh.

Tunhma chuan Satalhna hmun leh Chini zuartute dawr(Chini bag) velah khuai an awm luih luih a, hnawksak tham an awm thin. Tunah chuan khang Khuaite kha khawnge an awm zawh tak le? Satalhna hmunah pawh hmuh tur an awm ta meuh lo.

Kan changkanna hian kan thlai rah chhuah tur thlengin min hrek sak ta deuh niin a lang. Vaimim, Mai, Buh leh thlai dang dangte pawh a par bawmtu tur Khuai an rem tan mek vang hi nge ni, rah chhuah tha tak leh tunhma a hlawk taka thar thin kha kan nei thei ta meuhlo. In bul huan siamte tan phei chuan kan thlai te ah hian beisei a sang hleithei tawhlo.

Rannungte nen hian in ringtawn theuh kan nih avang hian pakhatin a tuar chuan kan tuar tlang vek thin a nih hi.

Magdalene in an Vocalist ban

Zo rimawi khawvel tan chanchin lawmawm a ni lova, kha leh chen hun harsaleh khirh tak karah pawhtalchhuak a, an rimawi hmanga Zoram dung leh vang tuamchhuak a, hma an lak tawh thinna chu chawlhsan tum lo mahse, Original line up an kim tawh dawn lova, Steward-a thusawi hi an laknat em avangin a aiawh tur Vocalist dang an la nghal a ni.

Hemi chungchangah hian band member te chuan hmanhmawh takin committee an nei nghal a, an thutlukna sawiin, “Magdalene hi chawlh kan tum lova, chawlh kan sawi ngai lo hrim hrim a, Amah berin, “Ka thei dawn lo” a tih avangin vocalist dang kan la ta mai a ni. “A chawlh thu pawh mimal takin kan la hriattir lova, mipuite hian thu dik hria se kan ti a ni. Anihna takah chuan khatianga a sawi ta mai kha kan lungawi lo hle a, hrehawm ti tak chungin a chawlh a ngai dawn ta a ni,” tiin band member te hian an sawi.

THIL AWMDAN SAWICHIANG
Hetianga an hmalaknaah hian mimal inhuatna leh intihthiam lohna engmah a awm loh thu sawiin, “Steward hi pa tha tak a ni a, engtik lai mai pawha hlim thei reng a ni. A thinrim lai hmel kan hmu ngai lova, thawhpui nuam tak a ni bawk. Tunah pawh hian thawhpui kan châk em em a, a thutlukna siam pawh hi mimal thutlukna niin committee
chuan a ring lova, amah hnehtu (influence) a awm a ni zawk emaw chu aw kan ti hial.
“Magdalene hi amah nena bul tan kan ni a, amah berin a theih tak si lovah chuan, a chawlh a ngai dawn a, kan ngai dawn khawp mai. Kan inkarah inhmelmakna leh intihthiam lohna emaw, inhmuhthiam lohna engmah a awm lova, keimahni lam atangin, ‘Chawl rawh’ kan ti lo hrim hrim,” an ti a ni.

MI PAKHAT VANGIN KAL LO
Vocalist hriathlawh tak a awm tawh si lovah chuan band-in a tuar ang em? tia zawhna chu, “Magdalene hi Patea (drummer) vanga kal a ni lova, PB-a (Bassist) vanga kal a ni hek lo. Steward- a emaw Victor-a awm vanga kal a ni bawk lova, mimal hlawk tumna, mimal hamthat duhna leh lar tumna ang chi-in band hi a kal ngai lo.
“Magdalene hi band pakhat a ni a, steward-a a tel dawn tak loh avangin kan show-ah mi an lo kal loh phah kan ring lova, kan tlakchhiat phah kan ring lo bawk. Kan rawngbawlna a ni a, theih tawp chhuahin kan kal chho zel ang,” tiin an sawi a ni.

--------------------------------
VOCALIST BAN TAK STEWARD-A THUKHAWCHANG

“Tukin zing (nimin) khan vocalist thar an nei tih ka hre ve chauhva, band puitling tak kan niin ka lo hre thin a, mahse ka hriatpui miah lova thil an lo ti a, official takainbiakna leh chawl tura inhrilh hriatna pawh awm si lova band-a awm ve reng nia ka inngaih laia hetianga an che ta mai hi hriatthiam har ka ti a, min kham tawh a, min lo hne tawh hle a nih hi ka ti.

ENGNGE A CHHAN NI TA ANG?
“Band-a ka awm ve chhung zawng khan vawikhat chu chhungkaw thilte a nih bawk avangin ka phâ a, an hriatthiamnate pawh ka dil a. chuta kan thian pakhat min chhanna chu, “Kehdarh vek i la a ni mai a lawm” tih a ni.
“Ka hrethiam lo hle a, kan nu te pawh kha ka dem hial a, mahse tunah chuan kan nu kha demna tur engmah a lo awm lo zawk a nih hi tih ka chiang ta a ni. Pakhat phei chuan kan nu hnenah, “I pasal avang hian sum engzat nge kan chan (hloh) tawh i hria em?” te a ti hial a, vawikhat vel emaw ka phat tak avanga hetia an ti ta mai hi chu a mak a ni!

BAND KHAIKHAWM TUM HRAM HRAM THIN?
“Band-a harsatna emaw remchan lohna a awm te hian theih tawp chhuahin ka thiante
pawh ka huikhawm ve thin a. An Inah te luhchilhin, zai tur leh hla zirturte’n ka sâwm chhuak lawp lawp thin. Hei hi an mahni pawhin an hrechiang ber a, thu dik pawh a ni. dik tak chuan, ka thiante pahnih hian side band an nei ve ve a, mahse vawikhatmah ka sawisel ngai lova, tawngkam leh chezia pawhin ka lantir ngai lo.
“Kan thian pakhat phei chuan, ‘Magdalene band hi keh darh ila, band dang siam ang u’ te a ti fo thin a, hengte pawh hre lo ka ni bik lo. Vawikhatmah band kehdarh leh band atanga chhuah hi chhungte bulah ngei pawh ka sawi ngai lo.

A HLA LARTE LAK LET LEH VEK HREH Lo!
“Tha te te-a inbiakna awm miah lova, hetianga hma an lak tâkah chuan kei pawh ka rilruchu a na lutuk lo na a, hriatthiam har chu ka ti ve khawp mai. Heti hi anih chuan a thu leh a thluk ka siam, ‘Life Beyond death,’ ‘Save Me,’ ‘open Your Heart’, ‘ This world will Never Ever Stop Me’ tihte leh tuna kan hla thar, ‘Place of Angtel’ te hi band-a ka kenluh anih ang bawkin, an sak ve zel hi ka remti thei lovang.

ENGTINNGE NI ZEL DAWN?
“An kal dan danin an kal a ni tawh ang chu. Rimawi hi ka la chawlhsan dawn lova, fapa ka nei a, ka fapa te nen hian heng hlate hi new version te paw’n kan la siam ang chu! Ka thiante hian min hmangaih tak tak chu ni se, ka hriatpuinangeiin ka banna thu hi kan tifel ang

Via- http://zorimawi.blogspot.com/2010/09/magdalene-in-vocalist-ban.html

Zirna School kan kalpui dan hi

Kan naupan ve lai hun rei pawh ala ni lo, kum tlemte chauh a ni liam ta kha. Khang hun laiah kha chuan kan zirtirtute kha kan ngaiin kan kan ngaisang thei thin ngawt mai. An thusawi kha chu kan Nu leh Pa te thu ai mahin kan awih zawk thin.

Tin, Zirtirna min pek dante kha ka ngaihtuah let hian an lo va taimain, hmangaihna tak tak nen min lo enkawl thin alo ni reng mai.

Tun kum tlemte ral hnuah erawh thil a lo inthlak danglam zo ta niin ka hria! Zirtirtu hlutna a bo tial tial a, naupangten School a an zirtirtute an en dan pawh a he ta hret hret mai. Hei hi engvang ge ni ang? Tin zirtirna an pek dan danglam ta zel hian thiamna tak tak a paw chhuak meuh em?

Home work in pek teuh teuh leh Matric exam dawn a, Selection Test an neih pui a, Zirlai Matric exam thei tura Pawl 9 pass tawhte an chhawk then teuh teuh hian thatna aiin that lohna tam tak a nei thin. Mahni School leh Mahni hmingthat duhna avang ngawt a, pass parcentage sang ringawt kan um ta hi thil pawi tak a ni.

Matric Exam a top 10 te aia pass hram hram a inhlangkai miropui tak tak ka hre nual. Tin, Bord exam ah ti thalo mahse, Mahni tuina zawng leh chemkalna zawng subject an lak theih nana beihpui leh zirna lama hnufual deuhte chhawmdawl a chawikan hi zirtirtu pawimawhna leh a mawhphurhna a ni.

Tunlaiin Private English Medium School din chu sumdawnna ang maiin kalpui mek a ni a, heng avang hian Zirtirtu, zirtirna pek kawnga mi tui tak tak ten an daihlo a, Zirna a tui lemlo sum hmuhna a nih chuan tia Zirtirtu hna thawk mi engngemaw zat an awm ta. Hei hian kan Zirna a ti chhia a ni.

Zirtirtu tha tak tak kan la neih mek laiin, Zirna kawng a tuilo ve tak tak, hlawh hmuh nan chauh a duh, Zirtirna pek aia Zu leh ruihhlo dang duh zawk pawh kan kawl tun tawh in ka ring thin.

Ni 100 inhlawhna in sawisep a ti tam

Sawrkar laipui atanga Ni 100 inhlawhna tur lothleng hian mipuite tan awlsamna tam tak a thlen laiin thilthalo thenkhat kentel pawh a nei tih hi i chhut tel fo ang u.

Kan veng Kawnpui-ah chuan NREGS hnuaia ni 100 inhlawhna a thawk ten mahni hna an thawh ang a thawk tur chuan inphut ngam chi pawh ani tawhlo. NREGS hminga rik tawh chuan hahdam tak a inhlawhna tur tih hi rilruah a bet tel ta niin alang. Hna tak tak thawk tha peih silo, phunchiar em em bawk si mipuite hi kan VC te tan hian enkawl an hautak ngawt ang le.

Tichuan, NREGS hi kan thatp[uina leh hlawkpuina tam tak zingah a kentel thil pawi tak pakhat chu thatchhiatna hi a ni. Hna hahdam taka thawh duhna min neih tir a, hei vang hian NGO leh Kohhran hnatlang, KTP hnatlang thlengin harsatna kan neih phah ta niin alang.

Tunhma ang khan Kohhran leh NGO hnatlang ah pawh taimakna a reh tial tial a, kan Ni 100 inhlawhna rilru khan thatchhiatna leh dawngdahna lamah min kai her mek a ni. Han hi rim takin thawk ila, nikhat chauh pawh ni 5 inhlawh tur ah te hian thawh ni ta se, ni 4 danga kan hlawh tur kha min pe ta mai se, chumi hun chhung chuan mahni hna lamah taima tak leh thahnem ngai takin lo thawk ta zawk ila, chuchuan thatna pawh anei ve ngeiin a rinawm. Zelthel taka hnathawh a, sum tam tak lakluh hian kan rilru a ti piangsual zawk em le?

Ka Lalpa chu

Ka Lalpa chu:

1. School a kal ngai lo, mahse, mite a zirtir thin.

2. Lehkha thiam tiin ansoi gai lo, mahse zirtirtu tiin anko thin.

3. Doctor tiin ansoi gailo, mahse tidamtu tiin anko thin.

4. Sipai leh ralthuam anei lo mahse, khovel lal ten an hlau si.

5. Tu lakah pawh tlawm a duh thin, mahse, hnehna neitu a ni.

6. Sual reng reng a nei lo, mahse, misual berte thihna hmunah an khengbet si.

7. Mite hnehchhiahin a awm a, mahse, Pathian fapa ani si.

8. Indona hmun ah raldoin akal gai lo, mahse khawvel hneh a ngamtu a ni.

Kawnpuiah accident tam/Damdawi In thuam changtlung mamawh

Kum tam tak kal tawh atang khan Kawnpui leh a chhevel ah hian Motor accident a tam hle tawh mai a, engvangnge heng chhiatna hi alo thlen tih lam erawh ka sawi tum a ni lo. Heng chhiatna alo thlen hian Kawnpui khawtlang mipuite harsatna hi kan sawrkar hian a hriatpui ve em tih lam hi sawi sawi phawt ila.

Kumin chhung (Thla 6 chhung) hian kum kal ta 2009 chhunga Kawnoui leh a chhehvel a Lirthei chesual zawng zawng aiin Mortor accident a tam tawh zawk a. Chhiatna alo thlen thut hian Kawnpui PHC hi panpui a ni hmasa ber lothei thinlo. Hliam tuarte enkawlna pek nghal thuai an ngaih thin lai hian Kawnpuiah hian Doctor 1 chauh dah anih avang hian a training lai emaw, engemaw avanga a awm loh laite a lo ni ve fo thin. Doctor thutna damdawi In dang panpui an nih chhunga nunna chan ta pawh sawi tur an awm nual tawh ani.

Tuna kan ram hruaitute Naupang mai annih lai leh tleirawl chhuak awrh chauh an nih hun lai ata tawh Accident rapthlak tak takin a chhuahsan hleih theih loh ah hian Hospital lian zawk kan sawrkarin a dah thuai lo hi ram chhung Mipui zin mite tan chuan a himlo hle ani.

Tin, Kawnpui hi census hnuhnung berah khan In 1400 vel niin, he khua mai nilo, Hortoki, Bualpui, Khamrang leh Zanlawn, Mualkhang, Serzawl ten Hospital hi an tawmpui mek bawk ani. Chu mai bakah 1st IR Batallion Mualvum a awmte hian min tawmpui ve reng bawk a, a bikin nau nei tur ten.

Doctor awm tawhte reng reng an hahin, Medical Staff te pawh an thawkrim hle a, Doctor pakhat leh Staff nurse 5 chauh thawktu an awm mek a ni. Sawrkarah pawh PHC hi CHC a hlangkai turin Khawtlangin, VC te hruaina hnuaiah kan lo nawr ve tawh thin a, Total Band hial pawh huaihawt alo ni tawh a ni. Mahse, kan hotute hian engnge an hriat a, hmun pawimawh leh mamawh tak tak a dah silo a, hmun dang a an dah zel hi a pawi hle in a hriat.

Kan ministry fawng vuan mektute hian Hospital lian zawk ah han hlangkai thuai se zin mite tan pawh a thlamuan thlakin, thihna tamtak lakah kan him thei mahna. Tin, a khaw mipuite leh a apantu khaw dangte pawh hian kan mamawhna a sang hle tawh niin ka hria.

Hringnun hi

Pianglo apiang an vannei emaw tih chang ka ngah fo thin. Job-a ang mai khan ka pianni chu anchhe dawngin awm rawh se tih mai chak hial chang pawh ka nei thin. Mahse, hun a inher a, "dam man a awm mang e" ti a, ngaihtuah chang pawh atam thin.

Hlimna leh lawmna te chuan chakzawk nih inchuhin an in lehthal chhawk zak zak fo a, nuih chang a awm a, lungngaih chang a awm fo bawk thin, tah leh nuih kan fawm a nih ber hi! Piang hmasa ten piang hnuhnungte nun an ning a, an hrethiam theilo, piang hmasa te nun chu piang hnuhnung ten an ning vei bawk nen. Vawikhat pian ve manah heng thil hi chu kan tawng theuh a, kan la tawn zel tur pawh anih hi.

Chhuan thar an lo chhuak a, inchei dan thar a chhuak a, kan hair style thlengin a danglam a, chu chuan hringnun hi hun inherin a herpui mek ani tih a lan tir thin. Thingpui dawr a kan ei in siam te a dang zel a, chu chuan changkan lam pan tumin kan kal mek ani tih min hrilh nawn fo thin.

Hmanah chuan "In ngaih dan dan.." tiin mahni kawppui(Nupui/Pasal) tur pawh an thlang ngam ngailo, Nu leh Pa kutah engkim a awm. Mahse, tunah chuan, "Its my life" kan ti a, Samsona'n Delili a ngaizawng ang mai khan "Ka duh em a ni.." tiin mahni kawppui tur chu kan duh kan thlang ta. Kan tisual nge kan ti fuh tih hi chhut tham a awm ngei ang.

Hei hi ani HRINGNUN chu. Lungngaihna chhum dum karah hlimna kawl a eng fo a, Upa ten an lo tih angin, sawm thah ni ah pawh vawikhat lungngaih a awm chawk thin.

Chu hun chu i hmang mek a, tu nen nge i hman thin le? Hlimna tluantling a awmlo a, Tah leh nuih i fawm thin a, i kumkhaw hun hman na tur erawh anilo. Mahse, chatuan a i chenna hmun tur thlir rengin nge i hringnun chu i hman a, i tawn ang angin i hmang liam thuak thuak mai?

Chhiartu duh tak, khawvelah hian hlimna i zawng thin em? Hlimna tluantling reng reng a awmlo. Awm ni se, keimah, keimah ngei hian ka hmu tawh ngei ang.

Famkhua min lawi san ang maw?

Hmangaih mah ila, ka hmangaih thu erawh hrilh ka harsat si, hrilh loh chuan ka awm thei bawk silo. Engkim mai chu a buaithlak ber hunlai a ni.mahse, ka thianpa zarah kan inkawp rem ve ta. Phur taka hmalam hun ka thlir mek lai chuan, kan hmaah engnge lo thleng dawn tih reng ka ngaihtuah ngai lo, a ni pawn a ngaihtuah hi ka ring theilo. High School kal lai kan ni a, ngaizawng nei hma minti mai thei e, mahse, a hnu kum tam tak chhung chu midang reng ka ngaihtuah ngai tawhlo.

Kan school hi thingtlang tih takah khaw hmawr deuh a awm a ni a, In awm lohna chin kan thlen hi chuan kut insuih rialin kan kal dun ve hnak hnak thin a. Aw.. hun hlui a ni a, tunah chuan a ral ta, kohkir theih ani tawhlo.

Tichuan, Sunday tlai khat chu a thian dangte nen hlim takin kan lengho a, Ka theihnghilh ngai tawh loh tur zinga thil pawimawh tak chu ka thinlungah hian ala riak reng a ni. Hmeichhe tlemte ka fawh(Kiss) tawhte zinga a hmasa ber ani tlat.

Tichuan, A tuk Monday lo thleng mai tur chu kan School annual Sport tan hun tur a ni. Chumi ni atan chuan ruahmannate siamin, ka lo hmuahna hmun turte min hrilh a. Hmalam hun hlim takin kan thlir dun a. Mahse,,, chutia hun kan hman dun mek lai chuan a kut no tak mai chu ka chelh vawng vawng a, thil diklo a awm tlat!! "I khua a sik a ni.." ka ti a, "nia ka nuamlo deuhin ka hria, mahse pawi lo a hrehawm loh..." a ti a. Haw thuai a thain ka hriat avangin kan hun neih hlu tak chu ui tak chunga kalsanin haw zai kan rel ta.

Thimhlim chauh ala ni a Inkhawm turin ka insiam mek lai chuan, kan phone(Landline) chu a ri rang rang a, '..te-i' thiannu a ni, "nikhua pawh a hre meuhlo a, hei a khawsik a sang thut a, ilo tawntaipui ve dawn nia aw.." a ti a. Rilru nuamlo zet chuan inkhawm turin ka kal ta hnak hnak a.

Monday alo ni a, beisei ngam silo, beisei tak chung si chuan ahma ni a, ka lo hmuahna tur a min hrilh lam chu ka pan hnak hnak a. Minutes 15 zet ka nghah hnu chuan dar alo ri ta ral ral a, beidawng takin kan Class lam chu ka pan ta a. '...te-i' leh a thiannu thutna chu a awl tlat si. Ka rilru a nuam thei mawlhlo.

Roll call zawh chuan kan clasmaster chuan, "Vawiin chu games tan ani rih dawnlo a, Drill-na hmunah sawn va in line phawt ula.." a ti a. Tichuan engtizia nge maw ni tiin kan inzawt hlawm a, tumahin kan inchhang thei silo.

Kan in line up fel hnu chuan, Kan Headmaster chuan, "Vawiin zing dar 8:30 vel khan kan school a class X zirlai '...te-i' a boral a......." a bak engmah ka hre zui ta lo. ka mit deuh sulh sulh a, ka mit atang chuan mittui alo chhuak nghal zawih mai...ka zak si, miin min hmuh loh nan ka in hliah hram hram a. Ka thianpa chuan, min rawn din hliah vat a. Kha mi ni khan a vuina ah kan school zirlai zawng zawng kha kal tur alo ni a.

In ka thlen chuan engnge tih tur tih ber pawh hrelo chuan, ka vir tawn sek reng a, thianpa chuan min hrethiam takin ka inthlakna tur min rawn lak sak vat a. Tichuan kan inthlak sawk sawk a, '..te-i' te veng lam pan chuan hmanhmawh takin kan tlan liam ve ta a.

Aw ava hrehawm em...sawithiam a ahar a, sawifiah chi ani heklo. Famkhua min lawi san mai tur chuan ka ring phallo a ni. Mahse, An In tual kan va thleng chu mipui an lo thu khep khup mai a, Silpauline an lo zar bawk a, chuchuan engkim mai chu a tak ngei ani tih tuma min hrilh ngailoin a nemnghet ta.!!!

Inchhungah kan lut mai ngam silo, kawt a thutthleng awlah chuan kan thu a, ka kun ngawih ngawih ani ber mai. Chutia ka indawm kun reng lai chuan, ka darah chuan tu emaw ni hian min rawn kuah a, " '..te-i' a awm tawhlo a sin...." a rawn ti. Chu aw chu ka hriat than em em min duhsak taka thingpuite min lum thintu '...te-i' U aw ngei a ni.

Inchhungah min hruai lut a, '...te-i' Nu chuan min lo hmuh veleh, " En teh Mannte, '..te-i' hi han ko ve teh......, a awm tawh silo engnge i rawn tih dawn a, a chhan duh tawh loh che hi..." (Mann-a min tiin min ko thin a, '...te-i' leh a thian ten min koh dan angin minlo ko a ni). Ka mittui aluang nghal zawih zawih a, aw... kan hlim lai ni kha chu e nimin liam ta mai kha a ni a, ka hnenah thu tam tak i tiam kha i theihnghilh ta em ni ti rilru vawng vawng chungin ka thlah liam a, rilru khingbai leh kimlo takin mangtha tiin ka vai liam ta a.

Khang hun kha la reilo hlein hre mah ila, mite tan chuan kum tam a liam tawh mahse, ka tan chuan a hluilo, nimin ral ta ang mai khan a thar leh thin!!!

Ka hmangaih hmasa ber ka hnen ata Lalpa'n alak bo tak '...Te-i' hriat reng nan he thu hi ka hlan e.

Kawnpui Lal R.Khawma (MC BGM) in Kum 100 Hmel

Kawnpui khuaa hi Kolasib District-ah awmin khaw lian tak kan ni a, Census hnuhnung ber-ah khan mihring leh In 1405 lai kan ni a, tunah erawh kan thang tawh hle, Kum 1946 January ni 1 atanga Kum 1954 thlenga Kawnpui khaw Lal leh la damchhun Ex Sub. R. Khawma MC BGM chuan Kumin-ah hian a Kum 100 hmel a lo hmu dawn ta reng mai a ni Kawpui Lal R.Khawma M.C BGM hi Kum 1910 Dec 27th ah Bukpuiah a lo piang a.


Kum 1923 ah Lower Primary zo in, 1929 ah Aizawlah M.E. School a zir zo a ni. Dt 23.5.1933 ah British Burma Army ah a lut ve ta a ni. Dt 1.4.1937 ah Lance Naik ah a kai a,dt 1.5.1938 ah Naik ah a kai leh a,dt 1.7.1939 ah Havilder ah kai leh in dt 1.11.41 ah Jameder Quarter Master ah a kai leh a,dt 15.8.42 ah Subeder ah a kai ta a ni.


Sipai a tan chhung hian Medal pawh a la nual,a Medal lak te chu :- (1) Dt 24.4.1945 ah BGM & MC & Oak Leave,(2) Indian Defence Medal, (3) Star Medal 1945,(4) Star Medal (Pacific War),(5) War Medal (Pacific War),(6) Star Burma Medal 1943 te an ni.
Kum 1946 thla 8 ni 1 ah khan Mastering Pension in sipai atangin a chhuak a, pension an la tihfel hma hian Kawnpui Lal atan dah a ni.Dt 1.1.1946 ah Kawnpui Lal ah a thu tan a, Pu Saitulera a thlak a ni.


Pu R Khawma MC hi ‘Lal ban’ a nih zui tak avangin Kawnpui Lal hnuhnung ber a lo ni ta a. A Lal chhung hian Bawrhsap te pawhin an tlawh ve fo thin a, Pu Barkataki nen phei chuan Zanlawn chhoah khian an in Boxing hle a ni awm e. Lal ban a lo nih dawn khan a ho hian kawng zawhin ‘Lal bang rawh se’tiin an au rual thin. Lal dangten an khua leh tuite laka an tuar ang engmah a tuar ve lo a ni. Lal ban a lo nih ahnu a ‘Mizo Union’ a lo din khan ‘President’ hmasa ber a ni chho leh ta a ni.


Pathianin kawng tinrengah malsawmna tam takin a vur a, taksa hrisel tak leh mi vannei tak a ni. Kum 98 mi a nih thleng hian mit fiah lo emaw bengngawng n a la awm lo a, Hospital ah natna avangin dah luh a la ni lo bawk. Tun hun thleng hian a ‘Makpa’ pakhat tih chauh lo chu a tu leh fa te sun a la nei lo bawk. Kum 2000 vel atangin ‘Tar natna’ chi khat ‘ Prostrate gland enlargement’ lo vei ve in damdawi ei a lo ngai ve ta a ni. Tin, A nupui Pi Lalthangkimi hian Kuminah a boralsan tawh a n, amah hi Aizawl lamah a fate bulah a awm mek a ni.


Tuna Kawnpui khuaa Boys Hockey Academy awmna hmun hi Bawrhsap hnenah a dil a.Tichuan,khaw thenawm te nen bawng te talhin hnatlangpui an nei a, field chu an lai ta mup mup mai a ni.Khelmual an lo neih that hnu chuan ‘Inkhelpui’ an buatsaih a, team 36 laiah amah chauh ‘Refree’ a ni tluan parh a ni. A khawnbawl upa Pu Dara ‘Cup’ chhuah chu an inchuh thin a, helai hmun hi “R.Khawma M.C Mual” tih nit a sela a duhawm hle.


Tin, Kawnpui khaw Lal leh min la dampui awmchhun a nih avangin Kawnpui Youth Association chuan a hming a daih mai an hlauh avangin 2009 khan ama pualin Calender an siam a, tunah hian a Kum 100 lawmna buatsaih sak tumin a tu leh fate an berawn mek bawk a. Mimal emaw pawhin duhsakna leh lawmpuina a hlan theih a. Kawnpui Youth Association President -9862599151 emaw Gen.Secretary-9862812249 hnenah hriattir theih reng a ni.

(KYA te hmalakna a fakawm e.)

(Source: http://www.misual.com/2010/08/09/kawnpui-lal-r-khawma-mc-bgm-in-kum-100-hmel/

Hmeichhia te hmangaihna hi!!!

Ka ngaihtuah thin, hmeichhiate hian eng rilru nge an put ang aw ka tih vawng vawng chang atam thin ngawt mai. Nula ten tlangval hmangaih an nei ve thin em? Nge an nei ve tak taklo zawk le?

Kei mipa rilru ah hi chuan, hmangaihte tan chuan mahni theih tawkah kan duhna leh hmangaihnate an hriat theihnan leh kei pawhin nuam ka tih zawng tak anih avangin ka theih tawpin ka duhna ka lan tir hi hmangaihna kawnga ka tih tur niin ka hre thin.

Nupa kan nih hma atanga in care tan thiam tak nih hi ka duh fo thin. Chutah chuan ka sawi tum tak ber chu hei mai hi a ni. Kei hi ka vanduai anih loh chuan Hmeichhiate hian engnge an rilru ni ta ang aw ka ti a ni.

Ka duhna leh hmangaihna ka tihlan nasat poh leh min induh khum thin nia!! Chapo deuh taka ka ngaihsak lo deuh a, rilru dang pu mai thei anga ka awm chang chuan min ngaihven reng fo thin. Mahse, chu chu kei chuan thil lawmawmah ka ngai ngai tlat peklo nia. Hmangaihna chu sawi a fiah tur anilo a, thu leh hla a tawp mai tur pawh ani heklo. Hmangaihna chu ataka tihlan anih siloh chuan ka hmangaih chu a thlawn maiin ka hmangaih a ni tihna a ni mai hian ka hre thin.

Hmeichhiate hian an laka induh deuh leh engnge maw deuh hi anlo duh zawk zel niin ka hre ta. Mahse, chu chu hmangaihna kal kawng chu niin ka hre thei silo.

Inhmangaih tawnna leh in ngaihchan tawnna tello hmangaihna chu a lem mai ani.

I innghahna kha a rinawm em?

Mihring piang chhuak phat hian mamawh kan nei nghal duah mai a, Nasen i nih lai chuan I Nu hnute tui chu itan damkhawchhuahna tura i innghahna pawimawh tak a ni. Kum leh ni a lo vei a, Puitling (Nula/tlangval) ilo ni ta. Chu hunah chuan I Nu leh Pa chu tar mai ni tawh mahse, harsatna leh manganna i tawh meuh chuan i tan hriat chhuah loh theih ani thin lo.

Mahse, heng khawvel thil kan innghahte hi anlo ral a, mualmin liam san fo thin. Chung hunah chuan innghahna tur dang kan dap a, kan zawng a, hrehawm kan ti thin.

Mi thenkhat chuan Sum leh paiah innghahna an zawng a, thenkhat kan eizawnna ah kan in nghat a, thnekhat chu kan Fate ah pawh kan innghat a, Mahse, chung zawng zawng chu innghahna tlak anlo ni chiah em tih hi i chhut ve tawh ngai em?

Sum leh pai hi innghahna tlak ni takzet se, ka ngaihtuah thin, mi vannei tak tak an va tam dawn em! Mahse, Sum leh rohlu tak takin a vurh lek luk te zingah he khawvel hi hrehawm ti reng renga hun hmang an va tam si em!! Zoram ringtu intite zingah pawh hian khawvel thila innghat an innghahna ber lakbo a a awm tak avanga Pathian chunga vui vai ta mai engzat tak awm ang maw ka ti thin.

Bible chuan, "Lalpa ringtu a rinchhan Lalpa ni erawh chu a eng a thawl e..." a ti si a. Lalpa ringtu a rinchhan a nupui anih chuan a nupui lakbo a a awm hun chuan Lalpa a rinna chu lakbo ani ve ngei ang.

Lalpa ringtu, Amah a innghat mi, kan rin chhan pawh khawvela kan neih thil, kan fate, emaw, kan Ngaihzawngte emaw a nih chuan chung chuan min kalbo san hun alo la thleng thei, chutih hunah chuan I rinna chu thinurna leh hriatthiam lohna ina khat zo ngei a.

Tichuan, Lalpa ringtu, kan rin chhan pawh khawvel thil nilo, kan rinchhan Lalpa ni se. Chuta innghat tisual ta an awm ngailo a, innghahna tlak, rinawm leh dik a ni.

Zu leh ruihhlo a kan rilru hahna hliah tir tum mailoin, Kan chhas te leh Nu leh Pa te a innghat mai loin, Kan neih sum hausakna ah te innghat loin, Lalpa ah inghat ila, kan buaina leh harsatna tawh engkim chunga thu neitu hi i bel zel ang u.

I Phal ang maw?

He hla hi ka nau Phuah leh music hi a siam ani a, ngaihthlak ve tlak lek lek in ka hria. Guiter Solo hi ka tih awm ve zeuh zeuh a. Ka Blog tlawhtu ten, in lo en ve duh takin ka rawn chhawp chhuak ve thuai mai anih hi.

Mite hla ang a, mawi leh nalh lutuk chu ani bik miah lo. Mahse, naute kut chhuak chu tiin ka rawn ngaihlu ve a ni e.
Ka net alo chaklo khawp mai a, hei a Link chauh ka rawn dah ta mai. Min hrethiam aniang chu.

http://www.youtube.com/watch?v=amE69bdwdEk

Road to Gauhati (Dorothy)

Mizoram State Transport in Bus an neih that ve AC Couch ah chuan ka thu ve vang a, Vairengte ka thlen meuh chuan Khua alo lum tan ta hle mai. Tlai lam boruak ni mahse, phai khawlum milpui ang deuhin boruak a hot tlat.

Ka nula chuanpuite hi chu Mizo Nula ah chuan an fel ve top in ka hria an photo poh tarlan ve ngei tha ka ti a. Agra lama Hindi Train tura kalte an ni. Gauhati a Mizoram House an changlo buai vel kha chu an khawngaihthlak ve a nia.

Vairampur lamah poh Vodka lam an ngaihtuah velo, mi thnekhatte angin!!

Zinkawnga inchhar chauh mah niila, tun thlenga min la ron ngai der ve tute hi kan tar lang ve hram a ni. Shillong kan lut tep a, Zingkar a ni, lung anti leng ngei mai.

Pu C. Thuamluaia Dorothy ka ngaihtuah chhuak lo thei thinlo, he hmun ka kal pelh tawh phawt hi chuan. Far thing hnuaia Hmangaihna thawnthu mawlh kha.

Kan zotlang ram nuam hi chhawrhpial run i iang e, kan tih ai chuan a iang zawk em aw ka ti zui vawng vawng.

Bramaputra ah hian hmanni mai khan lawng chesualah mi pathum an boral a, an ruang lah chu, Bangladesh lamah hmuh ani chauh. Lawngah pawh ka chuang ngam talo.

Tlai lam ni tla tur chuan Meghalaya ram mawi tak a chhun hring nghulh mai a, Far thing ding thelh sung mai kara Ni tla mai tur rawn lang iar siar thinte khan mawina ava nei em. Siamtu ropuina an tarlang chiang ngei mai. Sialton Official leh Dorothy, Kan Kawnkhawpui leh ****-i te ka ngaihtuah chhuak, hnuk a ulh a, lung aleng. A hrehawm a, a nuam si. sawi tur a tam a a tlem bawk si.

Mahse, mi ram awt mai lo a, kan ram hi mawi leh thianghlim nalh taka siam tur hian mawhphurtu kan ni si a. Kan khawpui chhung plant leh a ruangam in din fuh lo tak hian Khawpui sawn kan mamawh ani tihte mi ngaihtuah thlen tir daih nia.!!

Bloger te hahna

Hei blog tlawhtute tan chhiar leh tlawh anawm zawk nan tiin ka blog chu a theme te thlak in arrangement pawh kan ti tha deuh nawk nawk a, David Ralte te bolg em tluk phaklo mahse, a hma ai chuan a tlawh pawh anuam ve deuh tawh mahna.

Tin, thu ziak tur lama kuh teltul a chakawm thin a, mahse, thu leh hla pai nei tlem tak tan chuan blog enkawl hi thil awlsam tak anilo tawp mai.

Chuti a nihrual chuan, thil tih ve uk tawh a, hlamzuih a riral tir leh mai erawh ka tum duh bik hauh silo. Tan han la leh talh talh ila, mite hlut sak pawh ala hlawh ve mahna tiin beiseina kan tisei ve leh ta fan a nih hi!!!

Ka blog chhete a ka kutchhuak thu fahrah te te min rawn chhiar sak thinte chungah lawm hle mah ila, zahthlak lam te pawh a kai tel deuh thin. Regular taka update tur phei chuan khawchhak aiawt ang tlat a khat nih lem siloh chuan a harsa si thin a.

Zin mi leh vakkual deuh reng mai ni ve ta ila, ziah tur pawh tawn hriat a mual mual pawh a awm ve thin tur hi ania. Mahse, chu lamah lah zin khawthawng khat ber pawl nih bawk si a, blog han siam ve hram chu a hahthlak thlawn mai ang tih ka hlau thin ani e.

Khawvel awptu alo lang

India chhiarpui hlaute khan han ngaihtuah ching se, hei zet hi chu an hlau zawk law'ng maw le ka ti thin. South Africa Khawmualpui ah, awmtu ropui chak leh thiltithei tak a lo chhuak e.

World Cup mitin ten kan nghahhlelh ti ila, mitin em chu a ni lo'ng chu. Mahse, nghakhlel tak a lo thlirtu tan chuan he hun ropui hi hmaih then chu uihawm tak a ni. Group match chu kan thlah liam ta a, Gropu match tan a nih atang khan Kohhran Inkhawmin a chhiat phah a, YMA leh tlawmngai Pawl dang tan leh Party, a, eng Pawl mai pawh tan zan lama Programme neih a ti harsa zo a, Tun dinhmunah chuan khawvel a awp a ni ti ila, kan swi sual tam lo ang. Ram hrang hrang in hal leh in er em em pawh Khelmualah rorelna pakhat hnuaiah an kun za ta. Football ropuina a lang chiang hle mai.

Infiamna khawvel hian mi tam tak thin lungah ro a rel a, hnuhma a ngah in, khawvel mi chitin leh hnam chitin te Africa khawmualpui lam hawiin kan mit kan len ruai a ni ber mai.

Tun tum ah hian upset a thleng nasa hle a, World cup hnuhnung bera Finalist, French leh Italy chuan Round of 16 an lut zo ta lo, hei hi thil mak lama ngaitu tan chuan a mak a, mahse, football ropuina ti zualtu ava ni em.!!

Round of 16 tan a ni ta a, Uruguay chuan Quarter final lut hmasa ber ni turin Asia khawmualpui atanga khel tha chho tak South Korea chu hnehin 2-1 in an ltu ta rup mai. Ram ropui leh ram hausa USA erawh an in pet tling zo ta lo.

Football khel ngai reng renglo leh en pawh en ngai reng renglo te pawhin, World Cup zet hi zawng kan ngaihven a, hriatthiam tum in kan chhut thin a nih hi!

He World Cup Football hian i thinlungah thu a sawi ve em? Kan hmuh lian tak chu Kristian ram ten an khelmualah Lal Isua an zahpuilo leh an chhuang em em a, a entu ten zu leh ruaihhlo, mipat hmeichhiatna nena kan lo sahawk viau erawh a inhmeh chiahlo mai thei.

Khawvel nunphung ti danglam tu He W.C. football hi tun dinhmuna khawvel mitinte hnena thuchah nei lian ber leh thawm neina thei ber, thuneihna nei lian ber a ni ngei ang le.

Hmangaihnatu dik tak chuan

"Samah sam luat a awm nemmaw a riang lungkham Parte" tiin bul kan tan phawt mai dawn emmi niang? Nulat/Tlangval laia kan rilru luahkhat em emtu pakhat chu Hmangaihna hi a ni ve hrim hrim mai.

Hmangaihtu diktak haia, hmangaihtu der hnen a a thianghlim mawina hlantu, hlan sual ta tak tak lah sawi tur an bo bik nang. Khawvel a ni miau a, ka tal buai a, tute thangkamah emaw kan awk a, a changin kan thang kamah an tal awk ve bawk mahna le.

He hla thu hian hmangaihna tih tawngkam hi mi ngaihtuah thui tir ngei mai.
"Hlimten i len chuan,
Lawmzel tang e..."

He hla hi Pu Zirsangzela(Fam) hla kha a ni a, lo ngaihtuah ve chhin mah teh. Mihring atanga chhuak hmangaihna hian engtikah mah min thlenpui theiin ka ring thin lo. Pathian chuan, a duhloh zawng kan ti a, Amah kan talhran san reng chung pawh hian min hmangaihna a dai chuanglo. Chu chu Pathian Pathianna tilangtu pawh a ni ang. Atana engmah tilo, leh a tana tenawm maite pawh hi min hmangaih tlat si.

Mihringte hian he hmangaihna hi kan nei ve thei em? Kei chuan, "kan nei theilo" tih hi ka chhanna a ni.

Ka hmangaih em em, a tello a,ni khat lek pawh rei ka tih em em khan, hmangaih zawk dang nei reng chung siin, min hmangaih thu min fah mawlh mawlh mahse, tufa hi nge lawm ang le. Ka ti thin, I nupui/Pasal duh tak khan midang lo chetsual pui ta se, hlim em em in lo kawp fo ta mai se!!!! "Hlim ten i len chuan lawm zel tang e" i ti ve thei ang em?

Kei chuan tihian ka ngai ve tlat. Hmangaihtu diktak Nula dang lakah a thikthu a chhe tur ani. He hlain a sawi ang a, ka awm dan a piang pawm a, lawm zel tur chu kawppui atan chuan ka duhnteuhlo. Hmangaihna diktak chuan, a duhloh zawng ka tih a, ka hlimna zawng tak pawh nise, a hmangaihna dai thiat zawnga ka pensan chuan a rilru a na ang. Ka hmangaih lemloh chu engtin pawh awm se, ka lawm zel thei mahna!!

I ngaihzawng, i kawppui khan i awm dan apiang engvakah a ngaih lem loh chuan a hmangaih lo che a ni mai lo maw?

April ni si May a par vul thin chu

1.
Ka ngaihtuah thin a, kum tam chu a vei tawh chiang tih ka hria. He April kung hi naupangte ka nih lai khan a kungah hian lawnin a kakpuiah hian thut kha ka tum ve fo thin. Biak In tual ka thlen chuan ka lawn chak si, Sunday School a kan zirtirtute khan an phal thin silo, khawih hram lo chuan ka kalpel ngailo. Kan Biak In tual mawitu ber kha a ni thin a, a par lai hi chuan thla kan la fo thin.

Hmanni mai kha lani hian ka hre thin. Mahse, hmanlai anlo chang ve dawn ta mai!! Tunah chuan a zungte puak chhuakin, lei chungah alo lang ve ta tuam tuam mai a. Mihringte hian chuan kan lo upat hian kan tleirawl mawina kan hlauh tila tial thin a ni si a. He thing erawh hi chuan a hlauh mawlh lo, a mawina a chhuah belh sauh sauh zawk nia.

He thing ka hmuh apaing hian kan naupan laia Chawlhni kan nghahhlelh thin ziate, kan zirtirtu fel tak takte kha aw...ka hrechhuak lo thei thinlo. Tunah zawng pa tling thankin zet kan lo ni ve ta reng mai a.

Zoram Kristiante hian engnge kan mamawh?

Lal Isua khawvela alokal llai khan natna tinreng tuarte a tidam thin a, mahse, kha hna kha alo kal chhan ber erawh a ni hauhlo. Chanchintha Luka ziak bung 4:18 ah chuan
“Riangvaite hnenah Chanchin
Tha hril tura mi ruat avangin
Lalpa Thlarau chu ka chungah a awm;
Ani chuan salte hnena chhuahna thu leh,
Mitdelte hnena mitvar neih lehna thu sawi tur te,
Tihduhdah tuarte chhuahtirna tur te,
4:19 Lalpa lungawi kum thu sawi tur tein,
Mi tir a ni,”
tih kan hmu.

Lal Isua chuan Salte hnena chhuahna thu leh mitangte hnena tanin hawnna thu sawite, Lungngai taka awm mekte chu thlamuan turte, in a hna a rawn tan a. A Pa Pathian tirh chhan ang ngeiin atawp thlengin a tuar a, a ni, khawvel a hneh hma loh chuan a tuar a ni.

Tirhkohte pawhin Lal Isua hna chu chhunzawm zelin Judai ram leh kawlkil thleng pawha a thuhretu niin, a chanchintha chu an hril zel a, Lal Isua neilotute hnenah a chanchin an hril a, Lal Isua hnenah an rawn hruai a, Kohhran an din a an tinghet zel bawk a. Chuchu Lal Isua thuchah laimu tak pawh a ni.

Tichuan, keini hian engnge kan buapui ber ni ve ta ang le. Bawih chhuah thu kan tiam ve te hian Bawih chhuah chu a hnailo mai awm a sin, kan Bible in, "An mahni pawh chhiatna bawih ni chung rengin bawih chhuah thu an tiam " a tih ang mai khan, eng eng emaw hlauhna bawih a tang reng chung si hian Bawih chhuah thute hi kan lo sawi kan lo sawi ve mai lo ang maw?

Engh thli chhia emaw a tleh hlek a buai ta chuk chuk mai thin ringtu kan ni ve em? Heng ang mi hi kan tam awm a nia. Vanapa Hall mawi hmawk tham chu Sakawlh hlau pawh kha an awm em ni khah? Zahthlak tihna chang kan hre hauhlo leh nghal a.

"Thlamuan takin awm rawh u keiin khawvel ka ngam ta" titu Lal Isua khan engtin min ngai ang maw. Kan Thlamuanna tura tuartu tan chuan thlaphanga kan awm reng mai hi a thinrim thlak hial ang chu.

Lal Isua lokal lehna hi kan innghahna ber a ni a, chu hun alo hnaih hun a thil thleng tur a tihte chu kan Lal Isua ngeiin min hrilh a, chung hun alo thlen chuan kan beisei ber chu a hnai ta ti a lawm a hneka kan lo hlau kawisawi thin hi chu a fuh chiahlo khawp mai.

Thlamuantu Lal Isua hi kan nei tak taklo em ni aw? Heng ang khawvel thilthlengin a tihbuai mai mai theih leh a tih mangan theih mai mai niloin Lal Isuaah awm ila. chutah chuan thlamuanna tak tak chu a awm a ni.

Hawh u Lal Isua hnenah i kir ang u.

Zoawi Lelte a fam ta

Pic Via mi(sual).com
Kan nu leh Pa te hun lai ata tawh tun thleng a thangthar te pawhin kan la hriat lar em em Zaithiam kumhlun Pi Vanlalruati(Zoawi Lalte) chuan hun rei tak alo vei tawh Cancer narna avangin Zanin(Ni 7 May.2010) dar 7:15 khan chatuan ram min pan san ta.

Kum tam tak chhunga Zofate min awi lungleng thintu leh kan lunglenna minhnem thintu Pi Vanlalruati hi Mizo hnahthlak tawh phawt tan chuan a hluin, kan ui takzet in a rinawm. Zaithiam tmtakte an chuai mek laiin a hlain tun thlengin Thangthar zawkte thinlungah hmun ala chang reng a, Thinluangah a hluilo a thar leh thin.

A hla mai niloin, ama zai ngei mai pawh tunlai Thalaite pawh hian an Cell Phone ah dah an la iai chuanglo. Zoawi Lelte in hetia min kalsan ta mai hi Zofate tan chuan channa nasa tak ava ni em. Thlamuan takin chawl ang che.

"Engtin ngai ang maw,
Zofa leng zawng ten;
Zoawi Lelte, ti mai a i fam tur hi.

Sakawlh an hlau thar leh ta em ni?

Tunlai hian Sakawlh hlauhna a zual hle mai a, a chhinchhiahna neih hlauin India Chhiarpui thar ber neih tum mekah pawh hian tel tumlo leh hlau mi engngemaw zat an awm a ni. Hman deuh atang tawh khan Roman Catholic Kohhran hruaitu lu ber Pope kha Sakawlh ngei ni a sawiin Zoram hmun tin maiah tlangaupui pawl an awm tawh a nih kha! Mahse, khatih hunlaia POPE nihna chelh mektu Pope John Paul-II chuan tunah chuan chatuan ram min pan san daih tawh.

Kan Bible hian Sakawlh lo lan tur thu hi alo sawi ngei mai a. Thupuan bung 13:18 ah chuan Sakawlh chungchang hi chhut thiam chuan chhut rawh se a ti a, a number chu 666 a ni tih pawh kan hmu bawk a ni.

Kan vengah hian chhut thiamlo in an chhut ve nasa a niang. Hman deuh khan Khawchhak lung lum hlauin Tlangsamah an pem a. An lokir leh nual bawk a, an In lehlo te an hralh tawh a vangin mi in chhe te te luahin bul an rawn tan tha.

A number 666 tih lai tak hian Mizo zingah harsatna a siam ta ber niin ka hria. Tuna Sakawlh hlaua inhmukhawm luih luih Local TV Channel(Zonet) in an rawn pek a kal khawm hote pawh khan. Tuna India chhiarpui loawm tur hi an hlau hle a nih kha mawle. An hlauh chhan pawh he census ah hian zawhna hrang hrang hi chhanna tur Number pekin a awm thliah thliah dawn a, a number khan dah mai tur a ni a, hei hi an hlauh chhan pakhat chu a ni. Sakawlh niloin Number hi emmi aw an hlauh zawk!

Tunah pawh hian Sawrkar hna thawk lai sakawlh hlauh avanga an hna bansan ta an awm leh ta. ID leh Ration Card hlau, Number hlau te hi engtia tih chi nge maw ni dawn le?

Tuna sakawlh a an puh ber chu UIDAI: Unique Identification Authority Of India hi niin ka hria. UIDAI ah hian Nandan Nilekani kha Chairperson hmasa ber a ni a, tunah pawh ala ni mek in ka hria. 2010 – 2011 Budget atan Rs 1,900 crore lai an nei.

Sakawlh chhinchhiahna neitu turte chu kan Bible han bih chian hian Lal Isua phatsan a, penbosan tute an ni dawn niin a lang. Tuna hlau em em thenkhatte hian chuan an Zu ruihbuai an sim chuanglo a, thenkhatin an dawt sawi an bansan heklo. Kohhran chhuahsanin Pawl an din zet zut bawk a, an mahni hian chhinchhiahna chu an nei reng zawk lo maw?

NIBIRU!!!!!

NIBIRU-in Kan Chenna Khawvel a tawk danglam tur thu hi nikum 2009 tawp lam khan kan hre tan a. Mak pawh kan ti hle a nih kha. Mahse ,NASA leh US ram hruaitute chuan 1983 khan he thil hi an lo hre lawk daih tawh niin sawi a awm bawk! NASA chuan 1982 daihtawh khan kan awmna Planet tibuai thei tur a awm in an hre tawh a. 1984 khan chumi chhuina chu an lo thawk tan daih tawh arsi/ thil tum lianpui pakhat lam tinzawnin URAS(Infrared Astronomical Satellite) an lo tirchhuak daih tawh ! Albert Einstein-a khan khawvel chhim tawp leh hmar tawp inhip siksawi khawlohna hlauhawm a la thlen tur thu a sawi a.Hnam upa tak Mayan hnam Calendar-ah chuan 2012 hi khawvel tawp kum a ni bawk.

"NIBIRU" kan tih hi arsi pakhat heltute zinga mi pakhat a ni a.He Arsi hian heltu planet tenau panga a nei a,a parukna erawh chu kan chenna leilung(earth) tia vela lian a ni.A pasarihna chu tuna kan sawi "Nibiru" a nih loh leh ,"Planet X" hi a ni.He Nibiru / Planet X hi tuna a lan dan chuan sen deuh vut mai a ni a,tin heltu thla (moon) a nei nual a ni. Arsi dum(dark star or Brown Dwarf ) leh Ni(sun) te pakhat leh pakhat an inhnaih ber tum a lo thleng dawn a,chutah chuan arsi dum heltu zinga a hla ber-Nibiru hian tuna kan ni chhungkua(solar system) ramri hi a rawn tawn (tan) pha a ni.Chu chuan hipna nasa tak inpawh siksawi khawlohna a siam dawn avangin tuifinriat tui tifawn-in "No-a Tuilet" ang kha a thlentir ang. 2007 khan Nibiru hi khawvel atanga hmuh theihin a rawn lang zuai tawh a nih kha . May 2011 a lo thlen chuan he Nibiru hi mit lawngin mi tinin kan hmu thei tawh dawn a ni.21th December , 2012 ah Nibiru hian kan ni chhungkua ramri chhung a rawn lut ang a,khawvel atang hian Ni(sun) pahnih nei ang maiin Nibiru pawh hi chhun engah kan hmu tawh ang. Tichuan. Lir-nghing nasa tak leh sik leh sa boruak chhe lutuk tak mai ten hmun an rawn luah ang. A nasa ber lo thlen tur hun erawh 14th February , 2013 - kan khawvel(earth) hi NIbiru leh ni(sun) inkar taka a awm hun a ni.Chutih hun chuan Lir-nghing turu tak , Tsunami ,chhim leh hmar hipna inpawh siksawi khawlohna nasa tak,leilung khikak phawk phawk leh tlangkang nasa tak(extreme volcanoes) a lo thleng ang.Khawvel hi nithum chhung zet dingin, a thim mup ang a,leilung insiam that (in rem that)-na emaw, "Rorelna Ni"a lo thleng dawn a ni.Chumi hnu,1st July , 2014 chuan Nibiru chu engtik maha kan khawvel rawn tibuai leh tawh ngai lo turin,kan ni chhungkua lalram chhung atangin a thlawksawn tawh ang.


NASA hian he Nibiru lo thlen hun tur hi 1983 atang khan a hre lawk daih tawh a,mahse vawiin thlenga a la zep ruk tlat chhan hi engvang nge nih i rin?Khawvel danga awm theih dan an ngaihtuah hman i ring em? NASA ,D.O.D.,National Military Inteligence , S.E.T.I., leh C.I.A. chhungril thurukah chuan "He hun lo thleng turah hian khawvel mihring hmun thuma then hmun hnih (2/3 of the population of the planet) an boral thei a,nung dama awm ho zingah hmun thuma then hmun hnih te chu eiin leh awm hmun(tawm hmun) harsatna avangin an thi thei bawk"tih chhutna an nei!NASA hian Hmar tawp atang a Hmar Tawp Entlang (South Pole Telescope) tharin he Nibiru hi a thli-thlai reng a ni. NASA leh US ram hruaitute hian mi tin an chhanhim zo dawn lo tih hriain, he hun atan hian a rukin an inpuahchah reng a.Mipuite erawh,an tana inbuatsaihna hun tha an la siamsak lo ta cheu a nih hi! Khawvelah hian vansang lam chanchin zir a,chhuitu - mithiam tam tak an awm a.NASA chauh hi hemi kawnga thil engkim hretu a ni bik kher lo. 01-2012 ah Engmah A Thleng Dawn Lo Titu, Mithiamte Thuchhuak Nibiru chungchangah hian "He thu hi dawt muhlum a ni" titu,mithiam tam tak an awm a,chung zingah chuan vansang lam chanchina kan rinpui ber NASA chhanna hnuhnung ber(ka ziak lai hian) chauh hi lo tarlang ta mai ila. Hre belh duh tan - http://www.universetoday.com/2008/05/19/no-doomsday-in-2012/ NASA hian tun hma atang khan hemi thuhla hi zawhna a lo dawng tawh nual a,he thu hi dawt muhlum , intihthaihna atthlak, thu belhchiandawl lo a nih thu te,NASA in vansangah chutiang Nibiru awmang tur hmuhchhuah a neih loh thu te, Hmar tawpa S.P.T. hmanga Nibiru an thlithlai loh thu te leh S.P.T. chu thil dang chhui tura an hmanrua a nih thu....etc. in a chhang ngar ngar a ni. "He zawhna pahnih hi nichin lawka ka dawn a ni a,2012 ah thil thleng tur anga hril lawktu bumhmang leh mi a ho hian thin an tirim hle. 2012 ah engmah chutiang thil thleng tur a awm lo.Planet Nibiru a awm lo.Ni chhungkua ramri rawn lut tur thil engmah a awm lo.Khawvel vir dan leh kal vel danin engmah danglamna a nei lo.Arsi rawn lut tur engmah a awm lo.Vansang thlipui tleh mai tur ang a awm lo. Intihderna mai a ni. Khawngaih takin lo hlauthawng duh suh u.Internet-a mi a ho thu thehdarh - 2012 chungchang chhanlet nan he Ask and Astrobiologist Webpage chunglamah khian,'Zawhna Sawmhnih' tih thuppui ka ziah saw.Napaung ho tihlauthawngtu ,thu awmang lo lutuk thehdarha Dollar tam tak hai luh tumte , mi a ho tumna hi kan dolet ve ngei tul niin ka hria."David MorrisonNAI Senior ScientistAugust: 12,2009 -00-Ka Thlir Ve Dan Mai MaiHe thil hi thil thleng thei a nih ang bawkin, inbumna mai mai a ni thei.NASA leh US hruaitute hian thu an lo zepin anmahni sahimna tur an buaipui mek a ni thei bawk a.Tin,Scientist dangten NASA tih mualpho an tumna vel mai mai pawh a ni thei.Politics lam thil vanga he thu hi lo chhuak mai mai pawh a ni thei tho.Tute emaw sum hai luh duhin chanchin danglam leh maksak an thehdarh pawh a ni thei tho bawk. BonusYAHOO! ANSWER -Jimkearney746's Answer ( Does anyone know anything about the planets aligning in 2012?)Chhanna tha ber an thlanchhuah -Mayan ho atang chuan 2012-ah khawvel a tawp dawn.
Scientist thenkhatte atang chuan Chhim tawp leh Hmar tawp inhip siksawi khawlohna nasa a thleng dawn.


Chhinchhiahna pasarih ringtute atang chuan khawvel tawp intanna tur a ni.
Engpawh nise,tawrhna nasa tak kan hmachhawn dawn a nih pawhin,chu chu Ruat angin a lo thleng dawn a ni mai.Khawvel hi ni(sun) hnaih lama a kal chuan Mercury(ni heltu zinga arsi-planet te ber leh ni hnaih ber) angin khawvel tuamtu boruak te hi kangin kat-ah a chang ang a,kan vaiin kan thi ngei ang.
Ni(sun) hlat zawnga khawvel a kalsawn a nih chuan,a kal hlat dan azirin ,ni(sun) tel lova thlai chin dan te,power siamchhuah dan thiamna te kan nei tho.Chuvangin,ni(sun)hnaih lama thlawh ai chuan a hla lama thlawh chu a chakawm deuh.
Pathian in a hun taka engkim a ti thin a,Pathian tihtur lo hriatlawk tumna reng reng a hlawhtling famkim ngai lo..... HomeworkI ngaihdan , hmuhdan , i hriat dan,i veizawng , i duh duh rawn tlak ve bawrh bawrh teh.

Khenbeh lem uchuak

He thu hi mi(sual).com a H.Vangchhia thu Post a ziak ang anga lak chhawn a ni e.

Tunlai hian St. Charles Borromeo Catholic Church, Oklahoma inkhawm thin te chu an biakin a thil intar avangin an lungawi lo viau a ni awm e. An biakin Maicham chung zawnah chiah chuan Isua Krista tawrh dan, inkhawm ten an thinlunga an hmuh theihna tura ruahman ni ngei tur lem chuan a Tai atanga chung lamah a Pum zawn a (abdominal area) mipa zahmawh ang taka siam a awm chuan biakin a inkhawm thinte thin a khei hle mai.

Chumi hmuna an puithiam Rev. Philip Seeton chuan, “mi thenkhat thinrim a biakin an chhuahsan laiin, a then te chuan duhlo tak chungin an inkhawm an chhunzawm,” a ti.

Janet Jaime, helai hmun a an iconography, he milim design tu erawh chu engmah sawi lovin a ngawi reng thung. He milim hi feet 10 vel a sang niin February ni 21, 2010 atang khan a in khai tan tawh a, an puithiam chuan a tih buai veloh thu sawiin a lak sawn tir dawn lo tih a sawi!

NB: Isua khenbeh lem (crucifix) han tih hian Isua lem, a hmaifang ang tak tak ang tura siam a nilo tih hriat a tha. Mihring tawrh ai a tawrhna, kan rilru suangtuahna in a ngaihtuah chhuah theih nan a siam a ni thin.

Link:http://www.misual.com/2010/04/17/khenbeh-lem-uchuak/

Sangha i man dun ang hmiang

“Sangha i man ve ang hmiang” tih thawm chuan ka ngaihtuahna chu ati harh zawk hian ka hria a. “Ni e..” tiin Serlui tuikhuah avanga sangha lo tam ta leh, chi inthlah pung tura Serlui fintu lui hnar lam pan khawm a, lokalte chu, an tui zo tawh ang tiin, an tui zo haw lam chang turin kan thawk chhuak ve ta a.

A kawng hi rin ai phianin alo bel hlerh hlurh lemlo a, chutih rualin a kawng nuam zawk hreloin, Tialte lui dung kan zawh thla a, KURUNG hel ngai alo tam nasa mai chu niin kham pangah kan lawn thul, Adventure Team lam pawh kan iang lek lek mai. Mahse, a hlimawm dangdaiin ava nuam si em aw. Tialte lui hi Serlui fintu Tialpui zuk fin ve leh chhawngtu a nia.

Sangha tamna hmun tak Tialpui Lui chu kan zuk thleng ve ta. “Aw mi an tam, Beramno Lal lenna khawpuiah chuan..” tih mai tur emawni!! Kohhran leh Pawl te deuh Inkhawmpui zat zet chu kan ni ang chu, Lui dung tluanin mihring chitin, anlo zi mur mur mai a, Lui ka kal tawh a zawnga nuam ka tih ber tum a ni hialin ka ring.

Thenkhatin kerh kerh Mautheiah anlo thli kerh kerh a, thenkhatin chaw an ei, thenkhat an Sangha man sa puar luah khawpa tam phurin an haw mek a, Thenkhat anlo kal ve mek bawk. Thenkharin, “Khulai deuhah khuan Restaurant leh Bar a awm..” anlo ti! Len theh a piangin hlawhchham a awmlo, Sangha 10 vel tal chu a tlem tum pawhin kan hnukchhuak tho zel mai.

Hetiang hian hmun tin maiah len an pharh sup sup mai a, Mizo zingah len deng thiam, Petera ang mai kan lo tam khawp mai!

An man hnem hlawm em avangin a hringa hawn sen pawh a ni hlawmlo, Pic a kan hmuh ang khian hmun tin maiah a repna an siam a, keini pawhin kan han siam ve a, Kan Sangha man sa chu meiin kan han ur a, a bulah Changel hnah hlai tha tawkah, Mauthei ngei maia chhum kan Sangha man tharlam tak chu kan han bun hnuyk mai a, Mizo buh ngei mai hemi atan bika kan lei ngat chu kan han thet khu ram ram mai bawk a. Chaw ei tlem a har ngei mai.!

Ka ngaimawh deuhte chu, an Sangha man ate deuh chu chhar duhlo a, vaukama kalsan ta mai ho kha ka haw ngawt mai. An duhlo a nih chuan tuiah khan chhuah leh mai tur hi a nia. Tin, Sangha an tui hmaa, Tui tura Lui hnar rawn pante, lo mantute kha ka huat zawng tak an ni. An tui zo lochhuk hun kha lo nghah ve mai tur hi a nia.

Atawp berah chuan, kha hun nuam leh hlimawm tak, Sangha man khawmpui kha Aizawl khawpui atangin Palai an tam ber a, 4 wheeler leh 2 wheeler ding zawng zawngah MZ 01(Aizawl District)an tam ber a, MZ 05(Kolasib) in an dawt.

Hmelma

Nang i Hmelma chu tunge ni ve le? Mahni inthiam chawp chungin midang iva thlek dawk dawk ve thin em? Keimah leh keimah inthiamna nasatak nei chungin ka chunga thil thalo titute ka zawnga ka thlek ve duk duk thin.

Mahse, chung mite huatna rilru chu keimah atangin alo chhuak thin a, chung miten min huatna tur pawh keimah atang vek hian alo chhuak si thin. Tichuan keimah ngei hian ka rilru put hmang leh awm danin hmelma ka insiam a, chu ka hmelma haw tur chuan keimah vek ka insiam danglam a, ka rilru ka thunun thin a lo ni.

Drug i hmang sual ve em? Zu pawh hi i hmangsual ve em? A thatloh zia i hre reng a, i thianten an sawm che chuan iti leh mai thin a ni maw? Nia, i thiante kha Zu leh Damdawi i hmansual chhan kha an ni em? I chhungte pawhin kawm tawhlo turin an ti che em ni?

Mipat hmeichhiatna thlengin ilo hmang sual thin a ni thei e. Chutah chuan midang an lenglo a, puhmawh tur dang an awmlo. Nangmah ngeiin i remtihnain chung thil chu iti si thin a. Heng zawng zawng tih duhna chu nangmah atangin alo chhuak a, ti turin i nangmah ngeiin i pan a, Nangmah ngeiin iti ta a. Mawhphurtu dang an awm chuanglo. nangmah ngei kha i hmelma chu i ni. mahni i inhneh hmasak phawt loh chuan i sim duh ngawih ngawih pawh i sim thei thinlo a ni. Midang vang a ni lo.

Mahni hmelma hre silo in indona field-ah i kal ve thin em? I hmelma i chian hunah ral i do ve thei chauh ang.

Thawhlehna ropui

A tuarna avangin hnam tinin damna kan chang. Hliam a tuar avangin kan hliam damna alo thleng a, a lungngaihna avangin kan tan hlimna kawl alo eng ta.

Damna kim kan chan theih nan thawhlehna ni ropui tak chuan rawn nemnghetin, Chu thawhlehna chuan a famkimlo te tifamkimin, Sual leh a hnathawhte chu a titlawm ta.

Hmuhsit leh diriam hlawhtu, mifel suala an chhiar tak kha, Kross lera i sualna avanga A Pa Pathianin a kalsan tak, I Lal kha, thlanthimin a chelh hlen ruallohin a tho leh ta.

Thawhlehna ropui chuan itan leh ka tan zalenna kawng arawn hawng a, Dam chhung Bawih atangte tan chhuahna thu a puang ta.

Vut aiah pangparthi hruite, lungngaih aiah hlimna hriakte.

Khawvel rorelna a zawnga thutlukna siam rang ber mai, Rom Sawrkarin Juda mipuite thuzawma kros lera a khaikan tak kha an tana rorel leh turin hnehna thuam famkim nen a tho leh ta.

"Atho ta, a tho ta,
Fak ru Isua a tho ta"

Phir pathum

He Balhla hi a mak danglam ve riau a nia, Balhla Phir pahnih hi chu a awm ve nual mai a, hei he Balhla zet hi zawng kei ka hmuh vawi khatna a nia, mak danglam ve riauin ka hria a kan Post ve leh tawp mai a ni.

Hei hi chu a pic a fuh vaklo a, a lang kim theilo. Sonyerickson K530I hmanga ka lak a nia, a lo cupture fuh vaklo a ni ang e.

Tunlai mi anlo ni tawh

Hman deuh ata tawh tunlai mi nih leh tunlai kha kan duh ber kha a ni thin a. He rilru, kan Nu leh Pa, Pi leh Pute rilru a awm kha keimahni ah pawh hian ala awm reng. Kan tunlai dan leh an tunlai dan erawh hun inherin a her chhuahpui dan a dang deuh mai pawh a. Khang hun lai, kum engngemaw zat liam tawhah pawh khan tunlai duhin uchuak taka incheiin anlo tunlai tawh.

Khang hun laia Kekawr tlang mawlh mai kha aw… duhaiin a ha tu ngei pawn a arh ang a tih tur khawp a arh khan an han thui a, a arh lutuk kha kal vel a harsat phah hian ka ring thin, mahse, chuti chung chuang arh tawk tak lo kha chu an ha duh derlo, a tunlailo tlat a.

An sam lah khan awm ngaihna a hre bik em aw ka ti. Sam kawlh fua mai kha chu tunlailo tak a ni. Mizo tlangval India sipai a an tan hreh chhan ber pawh kha kan sam minlo meh kawlh sak ang a, kan chhuti hunah minlo nuihzat dawn em a sin tih kha a ni ve tlat. Mipa ten Dar vaw hnap in sam an han zuah sei siau mai kha chu a hun lai chuan mipa sam a ni a, pa tak a nih thin kha mawle.

Tichuan, Kekar tlangarh tha tawk tak, kal zawng pawha phe ri hlup hlup thei khawp kha an han ha hluai mai a, Kekawr mawngah chuan chiang takin, awlsam te a hmuh theih turin LOVE SIGN kha rawng lar(Colourful) takin an han bel ngei a, Kekawr mawng ipte ah khan theihnghilh miah loh turin SAMKHUIH TE an han thiat vah mai bawk a, Kamis pawh a ha tawklo lam deuh chua nih hi maw le tih tur ang chi te tit tet kha an ha tang mai bawk a, an kawngah a tlang lakhawma an suih tah tawh chuan tunlai tak a ni zel a nia.!!

Heng zawng zawng aia la uchuak chu an pheikhawk mawlh mai kha, chartin bung an bun emaw tih mai turin, pheikhawk hnuai kha chhah tha hlawm tak a ni, eng Company thui mah a nilo a, tam tak kha chu an mahnin an tuk a ni zawk! Mahse, a zahthlak miah loh tunlai dan a ni miau a.

Khi tiang khi kan dinhmun alo ni tawh thin a, tunlai thangtharte incheina hi engnge a an ve le? An tunlai tum dan hi a uchuak bik em? Tunlai tum theuh theuh indem thei kan ni em? Kan tunlai tum hun a inanglo mai a ni a, indem tur bik kan awm awmlo mang e ka ti thin.

Kawnpui khuah kang hlum

Kolasib District a Kawnpui khuaah vawiin khan Tlangval pakhat a kang hlum.

Tunlai hian hmun tin maiah kang mei a chhuak nasa hle a, Kawnpui khuaah pawh hian nitin mai ram kang thelh turin YMA leh VC ten information an pe chhuak deuh reng a. Kang thelhin mipuite an hah hle a ni.

Thu dawnna in a sawi dan chuan, Khawtlang hruaitute pawhin Kangmei chhuak ven nan leh a thelh nan hian NREGS(Ni 100 inhlawhna) sum pawh an hmang nual tawh a ni. Kang mei hian khaw chheh vel a tuam chhuak deuh vek tawh a, hmun tam zawk chu thelh mih a nih hnuah kangmei hi arawn chhuak leh thin a, tun tumah pawh hian khua atanga hnaite atangin kang mei hi a rawn chhuak leh a, Ram kang thelh tur hian in auh khawm a ni a, mipui te an chau tawh deuh nge, thawk chhuak thei an tamlo hle a, VC Information atangin "A thei thei pawh niloin, Khaw chhunga awm zawng zawng chu kang thelh turin thawh chhuah vek tur a ni" tiin an au a, Kang mei hian khaw chhung a lut hman deuh thaw a, nasa taka thelh anih laiin, kang thelhtu zinga mi Tv. H. Lalrintluanga chu thli na takin mei a chhem tak thut avangin mei kang hian a bawh ta a, a taksa pum in akang.

A kang hnu hian Kawnpui Damdawi In pan pui nghal a ni a, hetah hian a theih ang ang a, bawihsawm a nih hnuah Durtlang Hospital panpui nghal a ni a, Zanin Dar 8:30 vel khan a boral ta a ni.

Tunah hian Ram kang thelh hian thenkhat chu an la buai mek a, khaw thenawm Bualpui leh Mualvum 1st. IR Batallion ten an pui niin thu kan dawng.

Bamboo Dance(Cheraw kan) ah World Record

Mizoram Sawrkarin Art & Culture Department bultuma Kan hnam lam mawi ber te zinga mi Cheraw hmanga World Record siam tuma hun rei tak anlo inpuahchahna chuan a hmawr bawk ni a thleng ta. A boruak a sangin en man hla tak a ni.

Zoram Thalai rual ten phur taka kan hnam lam chul mailo a, an han lampui hnap hnap mai kha chu hmuh a nuamin ngaih a tha hliah hliah a sin.

Vawiin Zirtawpni chawhnu dar 3 vel khan Khawvela mau hmanga lam tam ber atan Guinness Book Of World Record ah ziah luh kan ni ve ta. Kan hnam tan thil chhinchhiah tlak tak a ni ngei ang.

Certificate poh Art & Culture Minister Pu P.C Zoramsangliana hnenah hlan a ni. Group (Bu) 671-ah, mi 10736 in an Cheraw hi an kan a, he kan record hi break tur chuan nasa taka inpuahchah a ngai ve ngei ang.

(Pic leh thu thenkhat hi Misual.com atanga lak chhawn a ni)

Chapchar Kut Aizawl Sipai Lammual-ah

Chapchar Kut 2010 chu a hmanna lian ber, Aizawlah chuan Assam Rifles Lammualah ropui thei ang bera hman a ni a, Chief Minister Pu Lal Thanhawla chu Kut Pa a ni.Kut Pa Lal Thanhawla chu Mizo pa hnathawh thuamhnaw inbelin Mizo mipui zawng zawng leh he ni-a lo tel ve, ramdang mite chu chapchar kut chibai a buk a. Min thlahtu, kan pipute chu lungbul be mi an nihlai pawhin kawla nichhuak chhiarin taima taka hnathawk thin an nih thu sawiin, ei an hmu thin a ni a ti a. Intihhlimna te pawh hmang ve thinin chapchar kut hi an hmang uar bik nia a hriat thu a sawi a.

Chuvangin, Kut hi intihhlimna ni anih angin, inthian thatna atan te, inlungrualna atan te, inkungkaihna tha zawk kan neih theih nante hmang turin mipuite chu a sawm a. Chhuan lokal leh zel tur ten hlimawm taka an rawn hman chhoh zel na turin ngaihtuahna thar nen hmanga, rilru siam that ni atan leh hmasawnna ke kan penna atan hmang theuh turin mitin a sawm bawk a ni.

Miss Chapchar kut kumin ah hian th;lan chhuah an ni a, he Kut miss thlanna hi Diktawn chanchinbu buatsaih a ni a, kum tinin Diktawn bultum hian Chapchar Kut Miss hi thlan thin tura ruahman a ni.
Miss Chapchar Kut 2010, Diktawn-in a thlan te:-
1. Lalrinsangi Aizawl Venglai
2. Nancy Vanlalhriatpuii Hnamte
3. Lalnunhluii Ramhlun Vengthar
4. Vanrengpuii, Electric Veng
5. Lalawmpuii, College Veng

Kumin a Chapchar kut Miss pawh hei a hmel ka rawn tarlang e. Lalrinsangi Aizawl Venglai a ni. An hmel hmuh a nuamin en an hahdam ngei mai.
Naktuk March ni 12 hian Guines World Record siam turin cheraw kan tum a ni a, DDK Aizawl in Live in chhun dar 12 atangin a pe chhuak tan ang a, Antena pangngai atanga en thin ten chawhnu Dar 2 atangin a en theih ang.

KTP Gen. Conf. vawi 53 na a tiak ta

KTP General Conference vawi 53 na Mamita neih chu Pzthianni zan khan a tiak ta. He khawmpuiah hian Rorel palai an kal tha hle kum dang zawng aiin an kal that ber tum a ni awm e. Mamit hian 1985 khan KTP General Conference hi anlo thleng tawh a, hetah hian palai 1384 an kal a, Tut lui atangin khawmpui palai kalte hi ke in Mamit thlengin an kal.

Kuminah hian Pathianni zan inkhawmah Palia 23000 vel an inkhawm a ni.

March Ni 6(Inrinni) chhun khan Mamit Kohhran Biak In ah Rorel inkhawm neih a ni a, heta thurel zingah hian hengte hi pass an ni:
(1). Kum 2011 KTP Rorel inkhawm thleng turin Bethlehem Kohhran a ni.
(2). Kum 2012 KTP General Conference thleng turin Thenzawl ruat a ni a, Thenzawl leh Thenzawl Field Veng Bial ten an thleng ang.
(3). Thuziak leh chhiar kawngah thalai ten hma kan sawn theih nan Central KTP in uar lehzualin hma la rawh se tih Chawnpui Bial atanga lut leh, Thu leh hla tawnghman dik kawnga hma kan sawn theih nan Branch tinte hlawkpui theih turin Central KTP in hma la rawh se tih Reiek Bial atanga lut chu Central KTP in a bawhzui dan tur ruahmanna lo siam se an ti.
(4) Krismas leh kum thar hi thianghlim zawka thalai kan hman theih nan Central KTP atanginrampum huapa inzirtir ni rawhse tih Dawrpui Vengthar Bial atanga lut leh, Rampum huapin Krismas hman dan inzirtirna neih ni rawhse tih Durtlang Bial atanga lut chu Cebtral KTP in ruahmanna lo siam rawhse an ti.

Tin, He roarel inkhawm hian kum 2011 kumpuan atan rawtna paruk awm zingah Thuawihna tih chu a thlang a, Budget atan Rs.13,50,000.00 pawm a ni bawk.

Conference ah hian Speaker atan Rev. Zosangliana Colney hman ani a, thupuiah 'Tho la i Pathian ko rawh' tih hman a ni.

Tu mawh nge?

Kristian-na in min chiah hnu hian sakhaw dang thil reng reng chu kan ngaimawh em em thin a. Chuti chung chuan kan ramah hnamdang/sakhaw dang chhinchhiahna leh an Biak In te hmuh tur a tam tial tial bawk niin alang. Abikin Hindu sakhaw betu te kan ramah an tlang nel tial tial a, Mizo Kristiante tan Central India lamah rawngbawl a harsa hle bawk a. Kan Kristian-na avanga ngaihdamna leh thuhnuai rawlhna kan changchawi thin hi zirtirna duhawm tak leh nelawm tak ni mahse, kan chhiat phahna laite pawh a awm ve a ni mahna!

Kohhran hmasa te hun lama Indona thianghlim an puang mai ang deuh khan, India rama Hindu ho nuam tawlna hi kan ram chhungah hian dodal ve deuh a tul tawh a ni mai em?

Kan ram chhung ngeiah Lawngtlai District a Sihtlangpui khuaa JNV School chu hman ni lawk khan MJA ten an va tlawh a, hemi tum a an mahni lo dawngsawngtu Principal chuan School Compound chhunga Hindu Sakhaw Biak In (Mandir) awm chu a ngaimawh a, thiat turin ngenna siam fo mahse an thiat duhlo a. Lawngtlai DC hnenah pawh an thlen tawh thin niin a sawi.

He School hi Contract in Rail India Transports & Economic Services in an sa a, hemi sak hna thawh mek lai hian he Mandir hi sak a ni.

Sakhaw hmunhma din chungchangah hian September ni 29, 2009 khan Supreme Court chuan order tichhuakin, vantlang hmunah sakhaw mal bik tan hmun neih emaw, sakhaw chhinchhiahna lam chi dah a remti lo a, He Order Supreme Court in a chhuah hmaa heng sakhaw hmun leh chhinchhiahna lo awm tawhte chu a awmna state sawrkarin remchang zawngin hma an la ang tiin thutlukna alo siam tawh a ni.

Sihtlangpui khua a, JNV School a Hindu sakhaw Biak In awm pawh hi danin a phal loh a ni chung pawh a, tun thleng a thiah ala nilo hi Lawngtlai DC mawh phurhna nge ni ang a, kan state sawrkar hruaitute mawh ni ang? Tu mawh nge?

YMA Platinum Jubilee Logo

Vawiin hi YMA Day a ni a, YMA Day chibai ka buk a che u. YMA kum 75-na pualin Platinum Jubilee Logo siam a ni a, a mawi khawp mai. Tlawmngaihna lamah tun aia thahnem ngai leh zualin tan ila zel ang aw.