:::HRINGNUN::: (Chapter-VI)

Buaina hi khawi atanga lokal nge a nih a, harsatna te hian engvangin nge min lo pan chawt zel le? Ih mo, ka theihna zawng zawngte hi beidawnna in a tuam a, chu chuan a phuar chau zo a, tih theih dang reng reng neilo ang hian ka zawh tur kawng pawh hrelo hian tuilairap in ka ding reng a. Tanpuitu mamawh em em hi tanpuitu neilo ang maiin buaina chhum dum chah takin min tuam vel thin.

Ih e, Mite hlimna chu ka tan thik tham a tling a, hnuchhawn ram, thlaler hmun  a duh tawh loh paih bo ang mai hian nun hi a khua a har fo thin. Ka innghahna berte chu thihna kutvawt chuan min laksak fo thin a, nuih ve chang ni awm mahse, tahna in a zui leh si thin.

Innghana ban tundin tumin rahbi tuk ve thin mah ila, ka innghahna bante chu a mal tete in tih tluk a awmin, beidawnna mai bak hmuh tur ka nei leh thin silo.

Ih maw, hlimna ka tawn ve te chu ka tan lungngaihna thuk taka min hruai luttu mai an lo ni leh thin si a. Tah leh nuih ka fawm a, nunkawng hi a bumboh a, hringnun rahka tin maiah hian tahna in min lo hmuak thin. Chu chuan kan beiseina chu beidawnna ruam thuk takah a luhpui fo thin.

Mahse, he nun khawhar leh phur rit phur reng reng a, tanpuitu neilo hian thian rinawm ber, manganna tawpah pawh min thlahthlam lo tu, hmangaihna tawp neilo a min kuangkuahtu Lal Isua a mamawh tih kan lo hrelo thin a ni. Amah nen chuan hringnun rahbi tin maiah hian hlimna leh lawmna a lo awm a, vanduaina leh manganna karah pawh lungawina kawl alo eng a, chhum zinna piah lamah khian min hruai thin.

EBOLA VIRUS LEH HOAX

Tulsi Leaves

Ebola Virus in khawvel a barakhai mek lai leh mi tam tak inrin lawkna pawh awm hman lova he Virus vanga an thih mek laiin, intihderna thu thehdarh mek an awm leh ta! Social network site hrang hrang leh Whatsapp lamah te an thiante thawn darh tura tiin Ebola virus laka inven danphuah chawp an thawn darh mek .

Ebola Virus hi enge?
Hoax chungchang kan sawi hmain Ebola Virus chungchang hi tawitein han sawi hmasa lawk ila. He Virus hi Ramsa atanga mihring ten kan kai chhawn niin mithiamte chuan an ngai a. Mihringa a hnathawh dan tlangpui chu kan Immune System a bei nghal chat mai a, Sipai rual chak tak maiin Nunau an suat mang ang mai hian kan taksa ralveng khawlte chu an nuai chimit hem hem mai a ni. Tin, Ebola Virus hian kan thisen a Red Blood Cell a bei nghal a, chu chuan kan nunna in nghahna lungpui chu a su chhia a, thiput reh theilo a siamnghal thuai thuai mai thin a ni.

Enkawl dam theih a ni em?

Hetiang hian thichhuak a reh theilo

Mihring in he Virus hi a kai vaih chuan thi tura inbuatsaih mek tluk zetin enkawl dam a harsa a, thihna luipui chu an dai tan mek ti ila a sual lovang. He Virus kai mi 90% chuan an thihpui a ni. Chumi awmzia chu mi za ah 10 chu an dam chhuak tihna a ni a, chuti a nih chuan i kai ve hlauh a nih chuan mi 100 zinga 10 vannei bik nih chu  thil harsa ava ni dawn em! Enkawl dam theih loh tluk a ni. Virus hnathawh hi taksa a a lanchhuah meuh chuan enkawl turin a tlai lutuk tawh thin. Chuvangin enkawl dam theih loh tluk a ni.

HIV aiin a hlauhawm
He Virus hi miin a kai tawh chuan a kai atanga kar 3 bak an damlo tlangpui a, chuti a nih chuan HIV aiin a hlauhawm fe zawk a ni.

Inkaichhawn dan:
Ebola Virus hi inkaichhawn a awlsam em em a, Amaherawhchu Indirect in boruak atanga a kai theih loh hi kan vanneihna a ni. Chutihrual chuan Ebola Virus pai taksa atanga thil chhuak reng reng atangin a kai theih a, an pangti insik atang ringawt pawhin Secound 2 chhungin kan kai hman der thei a ni. Mizoram ah he Virus hi alo thleng a nih vaih chuan thianho leh vantlang nun zalen tak kan nih avangin reilote chhungin kan pulzo mai ang tih hi thil hlauhawm tak a ni a. India ram a lothleng a nih chuan Mizoram ka fimkhur nghal hle a ngai dawn tihna a ni.

Vaccine a awm em?
Awm lo. He hri hlauhawm laka invenna hi hmuhchhuah ala nilova, mipuite kan him.zawk nan Engpawh kan ei dawnin kut fai taka sil tur a ni a, kan ei leh in tur reng reng hmin taka chhum tur a ni a, tui thianghlim distill water chauh in tur a ni a, Lui tui in thin chuan chhuan so ngei ngei bawk tur a ni a. He hri hi India ramah a lo lut ve a nih chuan Mipui zingah leh punkhawmna atanga inthiar fihlim tur a ni.

Ebola Virus chungchanga HOAX hlauhawm chu:
Ebola Virus hian Human Immune system a khoih chhiat laka vengtu tha tak chu Tulsi Leaves(Tulsi hi thlai a lema kan hmuh hi) ei thin tur a ni a, Zing tin tuilum chi al a inbual a, tuilum chi al a tam thei ang in thin tur a ni tiin dawt thu an vawrh darh mek a. He thu hi thutak a ngaiin Tulsi lei tur an zawng huai huai a, Karnataka a tleirawl pakhat chu He HOAX avang hian Chuap infection awm avangin a thi a, Tin, mithi hian Ebola Virus a pailo a, a awmzia chu kai ve a hlauh em avangin he inbumna thil hi awihin a vei loh nan Treatment hi a la tihna a ni. Tichuan a taksa tana thalo tur thil chu a him na tur emaw tiin uar takin a eiin a inbuatsaih a, mahse a thihpui ta!

Tin, Tulsi leaves hian Ebola Virus lakah a veng theilo mai nilovin mihring hriselna atan a hlauhawm zawk a, tuilum chial in hnem lutuk avang pawh hian Ebola virus lakah kan him phah thei lova, in tam lutuk phei chuan thihna hial a thlen thei a, dehydration nasa tak leh Kidney(Kal) thalo a thlen awlsam hle bawk a ni.

PS: Buaina leh harsatna engemaw miin an tawh laia Hoax a tam em em mai thin hi chu a pawi thin ngei mai