CHHIATNA RAPTHLAK!!

September Ni 29 a ni a, a tuk mai Ni 30 chu ka piancham a nih dawn avangin phur takin a tuk lama ka piancham lo thleng mai tur hre reng chung chuan zing ka tho a, hmai ka phih mawlh mawlh a. Kum heti zat nih tawh hnuah pawh Birthday a lo thlen dawn hnaih hi chuan ka phur ve viau reng thin a. Mahse!!!

Zing Ni chhuak pawhin tuk dang ang thoin mawi takin a eng a chhuah a, Mitinte chu an mahni hna theuhah buai em em leh hmanhmawh tak takin an phe leh suau suau tawh a. Kawnkhawpui a chhiatna lothleng tur rum thawm erawh tuman kan hre silo!! Mahse!!!

ZIng Dar 8:30 a lo rik meuh chuan kan thu hriat chuan Kawnpui mipui te min tuam chhuak nghal a, Lungngaihna in thla a zar a, mitin mai chuan, "Ava rapthlak em!!" tiin aw kan chhuah a. Kha chhiatna kha hnuk bo leh turin Tha leh zung tam tak pawh sen ral ngai dawn se kan hreh hauh lo, mahse tih thei a awm tawh silo. "A pawi em mai.." tih mai loh chu.

Hmarvengah Motor in Scooter a su a, a chuangte an thi vek tih thu ka hriat chuan,, chhiatna thlenna lam chu hmahmawh takin mi hnungah ka tlan chho ve nghal a. Mahse, an mahni chu mi tlawmngai tak tak ten an lo la chhuak fel dim diam tawh a. Pu Laldawngliana te chhungkua an ni tih ka han hre ve chawpchilh chauh a.

Pu Dawngliana hian a Nupui Pi Lalhmangaihi leh an fapa Lalramnghaka chu Balhla an tuk tur chu Scooter hian ava thlah a, Motor hian Kawng chhakah nawr betin a hmunah hian ka pawh chhawn tur awmlo vin Rihsang mual thlengin a lo nawr liam ta chu lo niin!! Pathian rorel dan hi ava mak em.

Pathianin mihringte hnena malsawmna min pekte zinga hlu ber mai, chatuan thlenga an chhawm theih tur Fa a pek, an hmangaih leh an en nin theih loh Kum 8 mi lek chu an fa neih chhun a ni a.  An chhungkaw thumte chauh chuan hlim taka hma lam hun thlir chung leh Pa berin a khalh a nih miau avanga thlamuang taka an chuan lai chuan Motor hian a hnawl ta mai a ni awm si a.

Chhiatna rapthlak tak tak kan ramah pawh a thlen ve mawlh mawlh a, mahse Chhungkua a vawikhata boral ta duak hi an la tam lo hle ngei ang le.

HRINGNUN Chapter-5

Midangte tan a lo tangkai ve takin:

Ruihhlo ringawt mai buaipui ka hman hlelh thin na ata Pathianah piantharna ka han chan ve tirh khan, kan chhungkua chu retheihna khur thuk takah kan lo tal lut tawh a. Rawngbawlnah ngaiin Revival Team te zuiin ka hman hlel ve thin a, mahse chungah chuan mittui tla chunga ka zin chhuah kha ava tam em!! Thian ten Bag nalh tak tak leh Beding mawi tak takin an tel a, an mahni ta ngei an rawn hmang a, kawr thar nalh tak tak nen an rawn inchei a, kamis thar emaw kekawr thar emaw hi kan zin chhuah dawn apiang hian an rawn nei thei deuh reng thin a. Kan zin chhuah dawn zan hian engmah neih ka nei ve ngai silo, leina tur pawh vana rah ang mai kha a ni thin a. Ka Nu khan mi bag hawh tur a zawng kual a, hun rei tak tak champui tur chuan tuman an bag tha min hawh tir phal heklo, bag hlui rawng da tawh tak, a zipper pawh tha tawhlo, a thuina peh hiai huai mai chuan ka thawmhnaw neih ve chhun chhun, kum hmasa christmas a ka Pa min thui sak te chu ka khung tan a. Beding telna tur pawh ka nei silo a, kan puanhlap pakhat hlui tawh tak chuan ka mutbu mi hmuh atan pawh a mawilo tak mai, Lapaw lang heng hung tawh leh ka Lukham puanthem a ip hnawh puar ruh tung mai chu ka tel muk ve nasa thin a. Rawngbawlna hmunah mutbu kan han siam sang sang a, thian ten Sleeping bag nen, Sava hmul a siam Lukham dup nuam tak takte, Blanket nalh tak takte an phawrh sang sang a, ka mutbu ka han phah ve a,... Ka rilru a na a, keimah ka inkhawngaih a, ka mittui hi thiante hriat loh hian a far zung zung fo thin. Camp kan chhuak a, Pathianniah Thianten thuamhnaw nalh tak tak leh Kawrchung nen an inchei laiin, kamis banbul rawng da lam tawh chu Pathianni a incheina ka neih chhun ani a, pheikhawk Bazara Rs.250 man ka Nu min lei chu ka bun ve ran thin bawk a. Pathian lakah hian ka vui lek lek thin!! Chutiang chuan kum 4 chhung khan ka hun ka hmang thin a, hlimna leh lawmna tam tak nei thinin, pathian hnathawh kan rawngbawlnaah lang thin mahse, ka retheihna chuan min tahtir fo thin.

Hun alokal deuh a, Kohhranah theihtawpin ka inhmang ve a, ka retheihna chuan min tibuai hle mai a, KTP leh kohhran thiltihna thenkhata tel ve ka zah chang a tam ta! Pathianthu sawite chu ka tim deuh dui reng a, mahse hei hi ka hria, PATHIANIN ENGKIM A NEI tih hi.

Zanah ka mut dawn apiangin Pathian hnenah ka thlen thin a, beisei tur a awm loh hnu pawhin Amah ka beisei tlat a. Ka tawngtaina ber ni thin chu,''Lalpa, i rawng ka bawl vena te hi alo zau zawk theih nan leh, tun aia ka thawh hlawk zawk theih nante, miten i thu ka sawi an ngaihchan theih zawk nan kan retheihna atang hian min khai chhuak rawh''tiin ka dil thin a. Pathianin min la chhang dawn tih hi ka ring tlat a, kum a liam zel a, ka dil ngai ka dil reng a. Lalpa chuan amah beisei tlattute chu a hawisan hlen ngai lo!! Ka unau ten sawrkar hna an han hmu ve ta nak nak a, chung pawh kan beisei phak loh hlir maiin hna an han hmu a. Kei erawh chu hna min pe ve talo tun thleng mai hian, Ama rawngbawl turin min duh a nih ka ring mai a.

Tunah phei chuan kan hausa ta ka tihna nilovin, kha ka dinhmun ata kha Lalpan mangang taka ka dil thinna kha min chhang ta!!

Kohhran lamah lah ka thlen phak pawh ka rin ngam ngai loh rawngbawlna pawimawh tak takah min hlang kai a, KTP leader nihna hial te pawh ka lo chelh ve tawh a, khawtlangah nise mite nih chak em em dinhmun tam takah min hlang kai a, ava ropui em!! Lalpa hi, rintlak, innghahna tlak, amah beiseitute hnena a chakzia tilang thin a ni. Ka duh zawng zawng erawh min pe lo, mahse, ka mamawh engkim erawh min pe thin.

Lalpa hi enge ka pek ve tak ang le? Tih hi ka inzawhna a ni reng fo tawh ang.

Natnatically

A nia lawm, khatih hun chhung khan khawvel hi a hrehawm em a sin, ka tan hian. Val hi a val theih tak tak loh a, Nuih a za tawi tarh mai a, ka thluak lah chu a chawlawl ta emaw ni tih mai turin a bing mup mup mai a, Mahni tawka chaw hehlo mi nih naklai chuan chaw kuttum tiat lek pawh tep niap niap chungin ka lem thei hram hram chauh kha a ni si a.

Ni 8 chhung zet mai pawn chhuak thei miahlo tura min bawih bet tlat a, khuma min nam bet tlat theitu kha natna lungkuailo tak mai nen khan intawn leh hi ka hlauh berte zinga mi a ni ngei ang mawle. Kan khaw lui te tak te te aṭangin Tlawng lui a ruang an hmuh thute thlengin ka ngaihtuah a. Kan kawmchhak pa Mamit kal lo haw theilo an buaipui te leh Tetea leh Ruth-i bo dan mak danglam tak mai leh an ruang an hmuh loh chhan turte thlengin chhui chhuak ta vek te hian ka inhre rum rum. Ka ngaihtuahna tawi mang mup mai chuan a ngaihtuah kim angreng phian lawi si.

Ni 8 lai pawn chhuak ta lo chuan a Ni 9 na a kan kawtkai pel a khua kan chuan ve leh zet kha chu, Ar khual an sawi ang maiin ka ṭi duk a, Phai ui kaih thlen hlim ang maiin mikal velte chu ka melh ang zuk zuk a. He dinhmuna min din tirtu Natna, natna mai pawh ka ti duh lo, natnatically hi ka va haw tak em.

'Mahse' tih hi a awm tlat. mahse, khatianga dam leh maithei natna ka tawrh mai pawh hrehawm ka tih em em lai khan, natna an dampui tawh dawnlo a ni tih hriat ngawih ngawih tuartute hlim taka an nui thei si te, thihna meuh an tawh pawh a, Pathian la fak talh talh theite nun hi ka ngaihtuah thlen chuan Ṭahna ruama tuihna thar chu an zawng hmu bik a nih dawn hi ka ti ta a.


Ntana leh hrehawmna ten a bawm mek lai leh, Chhiarna rapthlak leh Vanduaina ten a bawhbeh mek lai pawh a hlimna tak tak nun, lungawina nen a tuar zeltute nun hi Hringmi kan chan chhung hian a ai awhawm hi a lo awm silo. Chu nun nei tur chuan min pe theitu Lalpa hnena in pek zel mai hi ka lo thlang leh ṭhin.