HOSANA KA NEILO

Kum 20 zet chu a lo liam ve ta dawn reng mai. Kan Naupan lai khan Tumkau Ni hi nghakhlel tak khan kan thlir thin a, "Hosana Lalpa Hminga lokal chu a eng a thawl e...." tiin kan au rual a, kan Sunday School zirtirtu fel leh inpe tak takte khan min han kaihruai a, Lalpa fak zawng zawng zingah hian theihtawp chhuah a faktu leh tihtakzeta au kha kan ni ber awm e. Tumkhat kha Kan Zirtirtu ten Tumkau nei lovin tumah lokal loh tur a ni a, Tunkar chhungin lo ngaihtuah lawk vek tur a ni an ti a. Ka Pa lah chu a damlo a, Ka Nu in ramah riaklutin hna a thawk bawk si.. Kan In velah han ken tur mai a awm si alo. Kha mi tuma Hosana-na lama kal ka chak zia kha aw. Tumkau neilo chuan ka kal duh hauh silo. Dar 7 vel a lo rik chuan Kawngzawh chu an thawm ka hre phak ta. Rang takin In atangin ka tlan chhuak a, Naupang hlim taka Kawngzawh an zai rual thap thap ka hmuh chuan, Ka mittui hi a luang zawih zawih a, Tap pur chung chuan an Kawng zawh lai chu ka lo thlir reng a. Kan Zirtirtu Fel tak mai pakhat chuan min rawn hmu a. "Hawh le lokal ve ta che, ngatinge i tah a.." a ti a. Ka tawng chhuak lawk thei lo, Dar chhin awk awk khawp a lungchhia aka inhnit faih faih hnu chuan "Hosana ka nei ve lo" tiin ka lo chhang a. Chutia min hmangaih taka ka harsatna min zawttu an han awm chu, ka lung a chhe zual sauh ni hian ka hria. Kan Zirtirtu chuan Ama Tumkau ken lai chu min pe a, "Kal rawh le, kan kal rual zel dawn nia, hei i ta tura ka lo ken a nia.." tiin min kai a. Hlim takin ka zui a, ka thiante aurual rual chuan hrawk phiar tawng tawngin ka au ve a. Khang hunte khan kum tam min liam san ta. Ka damloh nikhua khan Sunday School a kan Zirtirtu te kha ka ngai ber thin a, min tawngtai sak a, min rawn kan changte khan ka va lawm thin tehlul em. Ka ngaisang a, an ni aia rin leh ngaihsan dang tumah ka nei ngai lo. Khatiang taka ka rilru chhungril tak a ka dah sang thei kha an rawngbawlna ah khan an lo inpe em mai a. Ngaihsan tlak hi an lo va ni em? Kan khua atanga 20 Km. vela hlaah kan Bial chhung a mi Kohhran(Khua) pakhat a awm a, khami hmunah khan Motor in a kal theih a ni siloh a. Naupang Inkhawmpui kan neihte khan Kan Zirtirtute khan min inpuak chhawk a, min paw thleng zak zak thin, Min paw chung khan an kokichhuan bawk a!! Ka theihnghilh theilo. Tun thleng hian Nitin School a kan Zirtirtu hluite ai hian Sunday School a kan Zirtirtute kha chhungril takah hian ka la zahin ka la dah sang zawk em em a ni. Tunlai Sunday School a zirtirtute hi enge kan an ve le? Khatiang dinhmun kha kan naupangte lakah hian kan la hlawh chhuak ve phak ang em aw ka ti thin. Tunhnua Sunday School Zirtirtu ka nih ve hnute hian ka tluk loh zia hi ka hre chhuak fo thin.