HMEICHHIA TE INCHEINA HI

Incheina han tih hian mihring a zirin kan incheina tih hi a inanglovin, a danglam nuaih ang tih hi a chiang sa reng mai a. Chumi a chian em em na pakhat chu kan Biak In inkhawmna a kan thuamhnaw hak atang hian a chiang reng mai. Tunah hian Sacrament Dept-te, kan KTP hruaitu te leh Kan Kohhran Upa te hi pakhat theuh thlang chhuakin inchei takin inhmuhkhawm tur a ni ti ta ila. Inchei inti rau rauah an thuamhnaw rawn hak chhuah chu a danglam hle ngei ang. Chu chuan incheina tih a kan rilru a a luh dan danglam zia a tar lang a ni.
 

Heng incheina zingah hian enge kan hnawl ang a, eng hi nge kan pawm ang le? Hnawl kan neihte hi Van lam khian a lo hnawl ve ang em? Kan pawm tam tak hi Van lam khian a lo pawm ve ang em le? Zawhna pawimawh tak a ni ngei ang.
Hmanlai kan Pi leh Pu te hunah khan Siapsuap leh Mizo kutchhuak puan hrang hrang hmangin an inchei thin a. Mipa in Puan an Veng a, Hmeichhia in puan an bih thung. Chutiang chuan dress bik an lo nei thin a, chu chu kan Cultural/Traditional Dress a ni. Hei hi kan chian hmasak hi a tul khawp mai tunlaia Biak in a kan dress zinga hnawl kan neih tam tak chhut chian nan hian a pawimawh hle mai thei.
 

Tunah chuan Mipa in Kekawr tlawn an ha a, Hmeichhiain Puan an bih/Pawnfen an feng tlangpui ta a. Mahse hei kan hnam incheina nilovin, English ho inchei dan kan lak(Copy) a ni.
Kan sawi tur ber, a goal ah lut dawn teh ang le. Kan Biak In incheina chungchangah hian mithiam tak tak ten an thuziak kan chhiar fo thin a. A ziaktu a zirin incheina chungchanga ngaihdan erawh a inanglo ta thluah mai a nih hi.
Hmeichhia in Biak In a kekawr tlawn hak hi a mawi em? Pawnfen an fen hi a mawi zawk em? He zawhna hi chu chu a ni e ti a chhan mai harsa tak a ni ang. Kekawrtlawn hi mipa te incheina chauh bik ani lova, Mizo History ah mipa incheina emaw hmeichhe incheina bik a ni ngailo.
 

Kan sawi tum ber chu Incheina kawnga kan inzirtirna hian Tunlai thangtharte Dress, nalh an intih em emna thuamhnaw te a hnawl ta lek lek mai. Hei hian Thalai, Thangthar lokal zel turte tan Kohhran huang chhunga ngampa taka lawi a ti harsa ta em le? Mawi leh nalh an intih dana Biak in a an inchei kan sawi hnawn sak mek lai hian, nalh inti lo chunga Pathian be tura Biak in pan hi an chak lemlo mai thei a sin. Hei hian thangthar, tleirawl zawkte Kohhran Thalai Pawl leh kohhrana kan hip hnaih theih loh na ah hian chhan lian tak a phur ve lo maw? Thlaraua thawh chu a ngai ve ngei mai a, Mahse, a hlawhtlin theih nan mihring ten kan thawh ve a, kan ngaihtuahna kan sen ve hi a tul hun a awm ve chawk thin.
 

Tin, Tunlai thangthar Zingah a bikin hmeichhia te hian Pawnfen chhing an uar thar ta hle mai a, hei hi Korean Serial atanga kan lak a ni awm e. Pawnfen chhing lutuk mai, kan taksa lang thui lutuk ang chi hi hak tam loh theih nise a duhawm hle mai. Nu leh Pa te pawhin hetilam kawngah hian kan fate incheina kan control deuh hi a tul hle a ni. Tunlaia kum tlinglo pawngsual leh Sex hman khawlohna hluar ta em em mai te nen hian inzawmna thuk tak an neiin ka hre thin. Kekaswr tlawn ai mah pawhin Biak in a hak atan chuan kei chuan mawilo zawkin ka hre thin. Sex Appeal siam thei ang chi thuamhnaw leh Pathian Biak hi a inhmehlo a ni. Chuvangin a chintawk leh mawi tawk anga inchei thiam a pawimawh hle mai.
 

Heng kan sawi takte avang hian hmeichhia ten Biak in ah Kekawr tlawn hak a tha ti zawngin dawng sawng lo ila. Thalai ten Biak In a kan incheina hi a mawi hnai zawk kan zawn thiam a tul hle a, chutih rual chuan Kohhran pawh hian ngaihtuahna zau zawk thangtharte tana kan sen ral hi a tul ve hle bawk maithei e. Engpawh nise Pathian biakna ah hian kan rilru a pawimawh rualin kan pawnlam landan hi kan chhungril nun pholangtu a ni tih kan hriatreng a tha awm e. Amaherawhchu, Hmeichhia te incheina atan puan bih tluk hi a lo awm lo a ni.