KAN NULA TE EDEN HUAN FASHION-AH AN LET LEH DAWN TA(?)

Mihring an ral kumte nen tih ang mai khan, Mihring kan ral zel a, chhuan thar an lo chhuak zel bawk. Chutiangin kan khawvel inher dan pawh a danglam ve zel a, kan duh zawng leh ngainat zawng pawh a inthlakthleng ve zel a nih hi. Tun tumah chuan Hmeichhe incheina lam bik hi thlur bing dawn teh ang.

Kan fashion chungchang hi kan sawi fo thin a, a thenin kan sel a, thenkhatin awm kan ti em em bawk a. A tha e, a tha lo e tih lamah chuan ka ngaihdan tarlan ka tum hran lo. hei erawh tarlan ka duh, mithenkhat sawi dan hi.

A hmasa berah chuan Pathianin Mihringte a siam khan Fashion chikhat chu a rawn intan tawh a ni tih hi hre tel reng ta ila.

Kumin kum thar hlim hlawt atang khan Pawngsual, Nula, Kumtlinglo..etc. pawngsual a awm hnem tawh hle mai a. heng pawngsual a lo tam tak em em chhan hi kan Fashion vang hi ni a ngai an thahnem hle. Kum tlinglo leh tleirawl pawngsual te hi, an mahnin an cho chhuah reng a ni a, an incheina Pawnfen chhing tak, mawng lak lek lek a an ha a, an mal zawng zawng deuhthaw langa kawtlaia an kal velte hian Pawngsual nasa takin a ti tam a ni an ti thin. Hei hi a dikin in ring em le?

Thenkhat chuan Bible in hun tawp dawn a, hun hnuhnung sign a sawite kha thleng tur reng a ni a. Tunah hian Bible in hun hnuhnung a ni tih kan hriat theihna tura Sign lo awm tur a sawite kha a thleng dik chho mek a ni mai ti a ngai an awm bawk. Nang enge i ngaih ve dan le?

Eden huanah khan Fashion chu a lo intan tawh a, Pathianin Mihring a siam khan Saruak ngalngatin an awm a nih kha. Tin, A chhia leh a tha hriatna thei an ei khan Saruak an nih zia hria in, an zahmawhte khuh thei tawk tawkin Theipui hnah an inbel ta kha a ni a. Kha Eden huan Fashion kha lo thang zelin zahawm zawk leh mawihnai zawkin a lo inthlak thleng chho zel a. Khawvel changkanna mil zelin Fashion a in thlak a nih hi. Tichuan tunah hian kan Nula te Fashion hi Eden huan Fashion ah khan a lut leh tep ta! Nge kan lut mek tawh zawk?

Rev. William Williams Mizorama a hun hmasa

1.

He hmun Tlawng kam, Kutbul kai hian sawi a hlawh fo tawh a. February Ni 8.2012(Nilaini) khan Serlui Presbytery Standing Committee chuan an tlawh a, he hmun a ram lo nei tawhtu Kawnpui Pastor Bial KTP atangin tawiawm tura min beisei angin ka tel ve a. He hmun chanchin hi a tawi thei angin han sawifiah dawn ila.

Mizoram History a hmun pawimawh tak changtu Tlawng kam, Kutbul kai chanchin hi Kawnpui Pastor Bial KTP chuan hun engemaw chen an lo chhui chiangin an lo buaipui tawh a. April Ni 2.2011 khan he hmun hi tlawh chhuakin Bial KTP ten hun an zuk hmang tawh a. Helai a ram neitu Pu R. Kapthanga Hortoki hnenah a ram chhung a hmun pawimawh tak a awm thute sawipui niin, a ram chu Bial KTP hnenah hian 40ft. bial vel phal takin a pe a. Hemi tum hian a hmunhmate zuk sam faiin, inkhawmna hunte zuk hman a ni.


Kum 1891 March Ni 15 ah khan Welsh mi, Khasi ram Missionary ropui tak Rev. William Williams, chuan Tlawng dung rawn zawhin, Lawngin Mizoram a lo lut a, Aizawl pan tur a lokal a ni a, a rual hian midang pathum Scottist mi Benjamin Aitken, Assamese mi Kasinath leh Khasi mi U Khanai te an rawn tel ve bawk a. March Ni 15.1891 hian Kutbul kai hi an lo thleng ta a, Tlawngkam a Mizo lo awm an han hmu chu an Lawngte tidingin Vaukamah an chhuk a, Liankunga Khua a mi Naupang te leh Putar an lo awm a, Naupang ho hnenah chuan Nawalh leh Bible Milem te an sem a, Hla te an sa a, Naupang ho chuan ngaihnawm ti takin an lo ngaithla a. Lawng lam pana an kal san hnu chuan an hla sak thluk ang chuan naupang ho chuan an tiri ve riai riai thawm te chu an hre phak a ni.

Hemi hnu hian Sairangah Lawng a inkar chho zelin, Sairangah hian Sakawr an lo nghak a. Aizawl hi Ke in an lut ni a sawi a awm thin a, Ke a lut lovin Sakawr hmangin Aizawl hi an lut a. Sairangah Sakawr lo nghakin, an Sakawr tur a lo thlen chuan March Ni 20 ah Sakawr hmangin Aizawl hi an lut ta a ni. Aizawl an thlen hnu hian Pathian thuchah te sawiin Chanchintha an hril nghal a. Thlakhat tlinglo hret Aizawlah hian an cham a. April Ni 17.1891 ah Aizawl chhuahsanin an haw leh ta a ni.

Tichuan, he hmun hi Serlui Presbytery chuan humhalh a, enkawl zui a tum mek a, tunah hian In te sak a, Chhinchhiahna lungphun te siam turin hma a la mek a. Kawnpui Pastor Bial KTP in ram helai a a lo neih tawh pawh Presbytery Standing hian Presbytery a hlan turin an dil a, Kawnpui Bial KTP hian phal takin Presbytery kutah hian an hlan a. Hemi bakah hian helai hmun a ram neitu Pu R. Kapthanga Hortoki Vengchhak hian Presbytery kutah hian a ram tin khat hmun vel pek belh a inhuam a, Presbytery hruaitute nen an in be mek.

Inkhawmpui hautak zet mai chu

March Ni 1 atang khian KTP General Conference chu Thenzawlah hmang turin kan inbuatsaih leh ta rup mai. Thalai tan chuan he inkhawmpui hi a hlu a, Presbyterian Kohhran mi bik tan chuan a tluka Inkhawmpui lian leh a tluka hlimawm hi a tamlo mai thei e.

Mikhual thlen ni a lo nia, Zoram hmun tin atangin Motor remchang kan hmuh a piangte hmangin kan inphur khawm ruih ruih mai a, a hlimawmin a phurawm thin ngei mai. Hmel leh hming pawh inhre ngai reng reng lo tur thenkhat te Nupui Pasal atan an lo intawnna a lo ni bawk nen. Pathian rawngbawlna huang chhunga han inchhar nawlh nawlh mai te hi a lawmawm danglam riau a ni.

Chutih rual chuan he Inkhawmpui lian tak mai hi thleng tur hian sum leh pai a va ngai hnem tak em. KTP Gen. Conference thlengtu tur a piangte buaina lian ber chu khawi atangin nge sum heti zozai hi kan neih theih ang tih hi a ni a, Fundrising Committee te lu tihai ber tu a ni reng tawh dawn a ni.

Kan veng Kawnpui in kan thlen tum pawh khan sum haih luh kawngah thahnem ngaih a na si, kan Bialtu Pastor te, kan sum lam ngaihtuahtu tur Committee te sawrkar dawrin leh Mimal(MP leh MLA) te dawrin fund awm thei angte an han beisei kual a, mawng vawmba ang zar zara an chet chung pawh khan kan in tuam hlawm thei awrh chauh mai kha a ni a. Khang sum Inkhawmpui puala kan hmuhte kha a thianghlim em le?

Tuntum a thlengtu tur Thenzawl khua pawh hian Inkhawmpui atan Budget Cheng Nuaih 34 chuang zet Budget ah an eiin ka hria a. Heti zat zat sum hi khawi a mi nge an hmuh ang? Ngaihtuah a tithui hle in ka hria. Kan Inkhawmpui Lian leh urhsun te hi Pathian hian a lawm ang em le tih hi ka ngaihtuah thin. "In inkhawmpui urhsun te hi ka hne a ni.." a ti ve mai lovang maw?

Sum thjianghlim leh dik taka hmuchhuak tur chuan Cheng nuaih 34 chuang hi hmuh chhuah a hautak dawn em a sin. MLA leh MP fund te kan pawt khawm mai mai thin em mi? Hengah hian kan Inkhawmpui neih chhan Pathian hi a lawmin, kan inkhawmpui hi min awmpui ang em le?

Heti lo zawnga a tangkaina leh a hlawkna te ngaihtuah duh chuan a am teuh a, sawi tur a tam tho awm e. Heti zawnga han thlir erawh chuan rilru a kalh a kim thei lo a nih hi.